TOShKENT, 17 yanv — Sputnik. Istanbuldagi tungi klublarning birida terakt sodir etganlikda gumonlanib qo‘lga olingan O‘zbekiston fuqarosi Abdulqodir Masharipov o‘z aybiga iqror bo‘ldi, deb xabar qilgan seshanba kuni Istanbul gubernatori Vasip Shaxin. RIA Novosti xabari asosida.
Ilgariroq Turkiya Bosh vaziri Binali Yildirim Istanbulda terrorchining qo‘lga olingani haqida xabar qilgan edi.
Shaxin jinoyatchini qo‘lga olish uchun Turkiya politsiyachilari juda katta ishlarni amalga oshirganliklarini aytib o‘tgan.
"Tashqi kameralardagi 7200 soatlik videomateriallar obdon o‘rganildi. Ushbu operatsiyada 2 ming nafar politsiyachilar ishtirok etishdi. Maxsus operatsiya nafaqat Istanbulda, balki — Konye, Xatay, Izmir shaharlarida ham olib borildi. 152 manzil bo‘yicha qidiruv ishlari o‘tkazildi, bu ish davomida 50 nafar shaxs qo‘lga olindi, qurol-yarog‘ va boshqa ashyoviy dalillar tortib olindi", — deya qo‘shimcha qilgan gubernator.
Suhbatdoshning so‘zlariga ko‘ra, Masharipov terrorchilik uyushmalari bilan aloqador bo‘lishi mumkin. O‘zbekiston fuqarosi bilan birgalikda uch nafar ayol va iroqlik erkak qo‘lga olingani aytilmoqda.
Eslatib o‘tamiz, Istanbuldagi Reina tungi klubiga Yangi yil oqshomida qurolli hujum uyushtirilgan. Kalashnikov avtomati bilan qurollangan terrorchi klubni qo‘riqlayotgan politsiyachini otib o‘ldirgan va klubdagi odamlarga qarata o‘t ochgan. Turkiya IIV ma’lumotlariga muvofiq, ushbu terakt oqibatida 39 kishi halok bo‘lgan, 69 nafar shaxs yaralangan. Reyter agentligi esa "Islom davlati" terrorchilik uyushmasi ushbu terakt uchun javobgarlikni o‘z bo‘yniga olganligini xabar qilgan edi.
