Jamiyat

Bank xodimlari uyma-uy yurib imtiyozli kredit taklif etmoqda

"Agrobank" xodimlari 813 aholi maskanidagi 1,3 millionga yaqin xonadonga tashrif buyurishni maqsad qilishgan

TOSHKENT, 18 yanv — Sputnik. Oʻzbekiston banklari bugungi kundagi muhim vazifalardan birini bajarishga — aholiga keng miqyosda kredit berish orqali tadbirkorlikka jalb etishga kirishishdi, deb xabar beradi Sputnik muxbiri.

Oʻtgan yilning dekabrida Oʻzbekiston prezidenti Shavkat Mirziyoyev Oliy Majlis palatalarining qoʻshma majlisida soʻzlagan nutqida yirik tijorat banklari rahbarlariga banklar oʻz ish uslublarini tubdan oʻzgartirishlari lozimligini taʼkidlagandi. Davlat rahbari moliya muassasalari oldiga aniq vazifani qoʻydi — davlat banklari har bir oila bilan muloqot tashkil qilish orqali fuqarolarning tadbirkorlik bilan shugʻullanishi uchun qulay imkoniyatlar yaratishi kerak.

Xususan, mazkur vazifani bajarish uchun mamlakatdagi yirik banklardan biri boʻlmish "Agrobank" xodimlari 813 aholi maskanidagi 1,3 millionga yaqin xonadonga tashrif buyurishni maqsad qilishgan. Shu munosabat bilan maxsus boʻlinma ham tashkil etildi. Bankning Qoraqalpogʻiston, viloyatlardagi boshqarmalari va 176 filialida maxsus boʻlimlar ochildi.

Asakabank binosi - Sputnik Oʻzbekiston
Jamiyat
Banklar fuqarolarga moliyaviy koʻmak beradi

Bank xodimlari xonadonlarda boʻlishib, tadbirkorlik faoliyatini boshlash imkoniyatlari haqida tushunchalar berishadi, qisqa muddatda kredit mablagʻlari ajratish boʻyicha tadbirlarni amalga oshirishadi. Bugungi kunda "Agrobank"ning yangi boshqarma va boʻlimlariga 576 nafar malakali mutaxassis ishga qabul qilindi. Bundan tashqari, dasturni samarali amalga oshirish maqsadida yana ikki mingdan ortiq tajribali xodim jalb etildi.

"Keng miqyosda malakali xodimlarning jalb etilishi oʻzining dastlabki natijalarini bermoqda. Xodimlarimiz 360 mingga yaqin xonadonda boʻlishib, tadbirkorlikni boshlash uchun ajratiladigan kreditlar, ularni berish shartlari haqida keng tushuncha berdilar. Kredit olishga qiziqqan fuqarolarga namunaviy biznes-loyihalar taklif etilmoqda. Bundan tashqari, zarur hujjatlarni rasmiylashtirishda ham yordam beramiz", — dedi "Agrobank" vakili.

Suhbatdoshning aytishicha, aholini tadbirkorlikka jalb etish boʻyicha keng tarqalgan usullardan yana biri xonadonlarga maxsus soʻrovnoma yuborilishidir. Mazkur usuldan mamlakatdagi deyarli barcha banklar foydalanmoqda. Birgina "Agrobank"ning oʻzi 890 ming oilaga ana shunday soʻrovnomalar joʻnatdi.

Bank bogʻdorchilik, chorvachilik, hunarmandlik, kasanachilik, xizmat koʻrsatish, servis va boshqa sohalarda kreditlar taklif etmoqda.

"Agrobank" 2016 yilda koʻp tarmoqli fermer xoʻjaliklariga 294,7 milliard soʻm miqdorida kredit taqdim etdi. Bundan chorvachilikka 14,9 milliard soʻm, parrandachilikka 856 million soʻm, baliqchilikka 381 million soʻm, teplitsalar tashkil etishga 6,1 milliard soʻm ajratildi. Fermer xoʻjaliklarini qishloq xoʻjalik texnikasi, agregat va ehtiyot qismlar bilan taʼminlash uchun bank 109,9 milliard soʻm kredit mablagʻi yoʻnaltirdi. Aholining isteʼmol kreditlari 82,2 milliard soʻmni tashkil etdi.

Yangiliklar lentasi
0
Avval yangilariAvval eskilari
loader
LIVE
Zagolovok otkrыvayemogo materiala