AQSh generali axboroti: "Rossiya Tolibonni qo‘llab-quvvatlayapti"

TOShKENT, 9 fev — Sputnik. AQShning Afg‘onistondagi harbiy kuchlari qo‘mondoni Rossiyani Tolibonni qo‘llab-quvvatlayotganlikda aybladi, deb xabar qildi RIA Novosti.

Jon Nikolsonga ko‘ra, Rossiya, Pokiston va Eron radikal "Tolibon" harakatini qo‘llab-quvvatlamoqda va bu bilan mamlakatdagi tinchlikka rahna solmoqda.

"Men avvalgidek ayrim tashqi o‘yinchilar, ayniqsa, Pokiston, Rossiya va Eronning ta’siridan havotirdaman. Ular "Tolibon" harakatlarini qonuniy deb topib, bu radikal uyushmani qo‘llab-quvvatlamoqda va bu bilan afg‘on hukumatining Afg‘onistonda stabillik muhitini vujudga keltirish urinishlarini yo‘qqa chiqarishmoqda", — deb ta’kidlagan Nikolson. General shuningdek, sanab o‘tilgan mamlakatlarning ushbu harakati tufayli NATOning Afg‘onistondan ko‘zlayotgan maqsadlari ham amalga oshmayotganini qo‘shimcha qilgan.

Moskva rasmiylari Afg‘onistondagi ichki mojarolarga aralashmasliklari haqida bir necha marotaba e’lon qilishgan hamda ushbu mamlakat vakillari bilan aloqalari faqatgina mojaroni barham toptirishga qaratilganini ta’kidlashgan.

AQSh tomon ham Afg‘oniston hukumati va "Tolibon" harakati o‘rtasida muzokaralar boshlanishiga yordam berish niyatida ekanligini bir necha bor ma’lum qilgan, ammo davlatning bu boradagi urinishlari hozircha sezilarli natija berganicha yo‘q.

Eslatib o‘tamiz, 2001-yildan boshlab Afg‘onistonda AQSh va uning ittifoqdoshlari harbiy kontingenti faoliyat yuritmoqda. Ular terrorchilarga qarshi operatsiyalarni amalga oshirib, mahalliy xavfsizlik kuchlariga yordam berib kelmoqda.