TOShKENT, 15 fev — Sputnik. Kuni kecha Malayziya politsiyasi KXDR yetakchisi Kim Chen Inning akasi vafoti haqida xabar tarqatgan edi. Qotillik ikki ayol tomonidan sodir etilgan. Ular qurol sifatida "zaharlangan ignalar"dan foydalanishgani aytilmoqda.
Janubiy Koreya Milliy razvedka boshqarmasi ma’lumotlariga muvofiq, aynan 2012-yilda Kim Chen Namga ilk bor su’iqasd uyushtirilgan. Ammo u muvaffaqiyatsiz kechgan. O‘shanda Kim Chen Nam o‘z inisi Kim Chen Inga maktub yozib, undan o‘zini va oilasini avf etishini so‘ragan.
"Men va oilamdan jazoni bekor qilishingni xohlayman. Bizning boradigan joyimiz yo‘q, biz qochib qutulishning yagona yo‘li — bu su’iqasdga qo‘l urish ekanligini bilamiz". Kim Chen Namning o‘z ukasiga yo‘llagan maktubi ehtimoliy matnidan Renxap agentligi iqtibos keltirgan, deb yozadi RIA Novosti.
AQSh hukumati fikricha, Shimoliy Koreya rahbarining akasi Kim Chen Nam Malayziya aeroportida KXDR agentlari tomonidan o‘ldirilgan.
Ma’lumot uchun, Janubiy Koreya OAVlari KXDR rahbarining o‘ta vahshiyligi haqida muntazam ravishda xabar berib turadi. Misol uchun, 2015-yilning aprelida Renxap agentligi KXDR O‘rmon xo‘jaligi vaziri mamlakatda o‘rmonzorlarni qayta tiklash rejasini barbod qilgani tufayli qatl qilinganini yozgan edi. Oradan bir oy o‘tib, xuddi shu agentlik Shimoliy Koreya Qurolli kuchlar vaziri Xon Yon Chxol harbiy tadbir davomida mudrab qolgani uchun pulemotdan otib tashlangani haqida ommani xabardor qildi.
