TOShKENT, 26 fev — Sputnik. Bu haqda o‘zining Feysbukdagi sahifasida O‘zbekiston xalq shoiri Xurshid Davron xabar qildi.
"Bir soatcha oldin Sirojiddin Ibrohim Termizdan qo‘ng‘iroq qilib, yozuvchi Mahmud Abulfayz Toshkentdagi kasalxonada olamdan o‘tganini xabar qildi. Yuragim zir titradi. Birdan Mahmud akaning Surxonning ardoqli shoiri Tesha Saydaliyevga bag‘ishlangan maqolasidagi so‘zlar yodimga tushdi: «Bu dunyoda shoirdan nima qoladi? Qolsa so‘z qoladi, boshqa hech narsa…» Mahmud akadan ham shak-shubhasiz So‘z qoladi. Yaratgan Egam ilohim bu ajoyib insonni rahmatiga olsin. Inna lillahi va inna ilayhi roji’un. Amin.", — deyiladi xabarda.
O‘zbekiston xalq shoiri Xurshid Davron Mahmud Abulfayz haqida u "donishmand" shoir deb tilga olgan.
"Mahmud Abulfayzni uzoqdan bilib yurardim, viloyat gazetalarida bosilgan badialari-yu u haqda yozilgan maqolalarni o‘qiganman. Ammo, erta bahorda, 6 kun davom etgan Surxondaryo safarida yozuvchi bilan tanishib, suhbatu hangomalashib, uning "Insonni armon ulg‘aytiradi" to‘plami bilan tanishib, ulkan bir ijod olamini kashf etganday bo‘ldim.
"Mahmud Abulfayz kamgap, menga o‘xshab ko‘p gapirishdan, tinglashni ko‘proq ma’qul ko‘rgan inson ekan. Uning shaxsiyatida o‘zbek xalqining, turli viloyatu tumanlarida uchratganim, ko‘rganim, donishmand vakillariga xos fazilatlar namoyon edi", — deb yozadi shoir M.Abulfayz haqida o‘z "kutubxona"sida.
