TOShKENT, 7 mar — Sputnik. Toshkentda xalqaro transport va tranzit yo‘lagini yaratish to‘g‘risidagi bitim doirasida tuzilgan ishchi guruhining birinchi yig‘ilishi bo‘lib o‘tdi.
Mazkur yo‘lakni yaratish haqidagi bitim 2011-yil aprelida Eron, Ummon, Turkmaniston, Qatar va O‘zbekiston hukumatlari o‘rtasida tuzilgan. 2013-yil aprelida Qatar loyihadan chiqishga qaror qilgan.
2014 yilning avgustida Ummon poytaxti Maskat shahrida O‘zbekiston, Eron, Turkmaniston va Ummon TIV rahbarlari transport yo‘lagini yaratish bo‘yicha bitimning amalga oshirilishi bo‘yicha memorandum tasdiqlandi. Kelishuv 2016-yilning 23-aprelida kuchga kirdi.
"Tomonlar bir oy muddat ichida depozitariyga (Turkmaniston) ishchi guruhining navbatdagi yig‘ilishida tasdiqlash uchun qator takliflarni taqdim etishi lozim", — deb yozadi RIA Novosti.
Gap, xususan, avtotransport vositalari uchun "yashil yo‘lak" tashkil etish, yuklarni saqlash va yuklash uchun qulay sharoit va samarali sxemalarini yaratish hamda dengiz portlari prichallaridan foydalanish haqida bormoqda.
Yig‘ilish qatnashchilari temir yo‘l transporti orqali yuklarni tranzit qilishda yagona tarifni shakllantirish masalasini ko‘rib chiqish hamda asosiy tovar pozitsiyalari haqida ma’lumot almashish, tranzit uchun so‘rov asosida imtiyozlar taqdim etishga kelishib olishdi.
"O‘zbekiston temir yo‘llari" kompaniyasining ma’lumot berishicha, tomonlar shuningdek, "Markaziy Osiyo — Fors ko‘rfazi" yo‘lagiga kiruvchi avtomobil va temir yo‘l yo‘nalishlari ro‘yxatini tasdiqlash uchun ishchi guruhi qo‘mitasiga taqdim etishga kelishishdi.
Transport-tranzit yo‘lagining bir qismi O‘zbekiston, Turkmaniston va Eronni bog‘lovchi temir yo‘l orqali, qolgan qismi Eronning Bandar-Abbos va Choxbahor portlaridan Ummon portlariga qadar dengiz orqali o‘tadi.
Transport yo‘lagi loyiha ishtirokchilari bo‘lgan mamlakatlar uchun yangi ish o‘rinlari yaratish, ijtimoiy va sanoat infratuzilmasini barpo etish, yirik tashqi investitsiyalarni jalb etish borasida muhim omil bo‘lishi kutilmoqda.
