Samarqand viloyat bosh imom xatibi o‘rinbosari gaz, svet, suv pulini vaqtida to‘lashga chaqirdi

TOShKENT, 11 mar — Sputnik. Samarqand viloyat bosh imom xatibi o‘rinbosari, Imom Buxoriy jome masjidi imom xatibi Zayniddin Eshonqulov "Zarafshon" nashri orqali aholini suv, svet va gaz haqini vaqtida to‘lashga chaqirdi.

"Bugun hayotimizni suv, elektr energiyasi, tabiiy gazsiz tasavvur qila olmaymiz. Bu ne’matlar uchun har kuni shukrona aytamiz. Ammo keyingi paytda ko‘cha-ko‘yda, davralarda ana shu ne’matlardan isrofgarchilik bilan yoki noqonuniy foydalanish, ularning haqini to‘lamaslik holatlari haqida ko‘p eshitapmiz. Bu ishlarning ortida esa aldov, o‘zganing haqiga xiyonat, boshqaning mulkini haq-huquqsiz o‘zlashtirish kabi dinimiz tomonidan butkul qoralangan illatlar yotadi.

Gaz va elektr energiyasi davlatning mulki. Davlatning asosini esa xalq tashkil etishini inobatga oladigan bo‘lsak, ushbu ne’matlarning haqini to‘lamasdan foydalanish xalq mulkiga xiyonat hisoblanadi. Qolaversa, davlat budjetiga tushadigan bu mablag‘larda pensionerlarning, kam ta’minlanganlar, nogironlar, yetim-yesirlarning haqi bor. Kommunal to‘lovlarni amalga oshirmayotganlar zikr etilgan qatlamlar haqini o‘zlashtirib yuborayotganlari, bu ishlari bilan o‘zganing haqini yeyayotganlarini bilishlari lozim. Vaholanki, Qur’oni karimda "Bir-birlaringizning mollaringizni botil yo‘l bilan yemang", deya kishilarni boshqaning mulkiga ko‘z olaytirishdan qaytarilgan.

Yuqorida keltirib o‘tilgan va ulardan boshqa ne’matlar insonlarga turli turmush qiyinchiliklarini yengillatish, yashash uchun qulay shart-sharoitlarni hozirlash uchun berilgan. Shuning bilan bir qatorda Qur’oni karimda "(Yer) yuzidagi barcha narsalar foniydir", demoqlik bilan ne’matlar abadiy emasligi, ma’lum miqdor va o‘lchov bilan chegaralab qo‘yilgani ma’lum qilingan.

Bu tabiiy ne’matlardan talab etilgan ko‘rinishda foydalanish, ularda hammaning ham birdek haqi borligini unutmaslik lozim.
Shunday bo‘lgach, har bir fuqaro o‘ziga yuklatilgan vazifalarni astoydil bajarishi, zimmasidagi majburiyatlarga vijdonan yondashmog‘i va o‘zgalarning haq-huquqlarini poymol qilmasligi, moliga xiyonat etmasligi zarur. Buning natijasi esa shu fuqaroning o‘ziga, jamiyatga, davlatga faqat manfaat keltirishi shubhasiz", — deyiladi maqolada.