Koreyaliklar Yakkasaroy tumanidagi xonadonlarga aqlli hisoblagichlar o‘rnatishadi

Obuna bo‘lish
Bu tizimda qaysi xizmatdan qarzdorlik bo‘lsa, o‘sha xizmat kompyuter tomonidan o‘chirib qo‘yiladi hamda kommunalchilarning uyma-uy yurib pul yig‘ishiga chek qo‘yiladi

TOShKENT, 5 apr — Sputnik. Poytaxtning Yakkasaroy tumani Boshliq massividagi 29-ko‘p qavatli uyda sinov loyihasi doirasida eng yangi gaz, elektr, sovuq va issiq suv hisoblagichlari o‘rnatiladi. Bu haqda Toshkent shahar hokimiyati hududiy kommunal foydalanish birlashmasi rahbarining o‘rinbosari Oybek Bekmirzayev ma’lum qildi.

Uning aytishicha, shahar kommunal xo‘jaligi tizimida smart hisoblagichlarni joriy etish loyihasini hududiy kommunal foydalanish birlashmasi Axborot va kommunikatsiya vazirligi va Janubiy Koreya kompaniyasi bilan hamkorlikda amalga oshirmoqda.

Elektr hisoblagich o‘rnatish jarayoni - Sputnik O‘zbekiston
O‘zbekistonda 2021-yilgacha “aqlli” elektr hisoblagichlar o‘rnatiladi

"Qirq xonadonli uyning 20 xonadoni tanlab olindi. Ularning har biriga yagona dasturiy ta’minotga ega bo‘lgan sovuq va issiq suv, berilgan issiqlik, elektr energiyasi, gaz hisoblagichlari o‘rnatiladi. Tizim yarim yil davomida sinovdan o‘tkaziladi. Ishlash uslubi juda oddiy: xonadon egasining telefoniga foydalanilgan xizmat uchun haq to‘lashi lozimligi haqida xabar keladi. Agarda to‘lov amalga oshirilmasa, aynan qaysi xizmatdan qarzdorlik bo‘lsa o‘sha xizmat kompyuter tomonidan o‘chirib qo‘yiladi", — dedi Bekmirzayev.

Uning qo‘shimcha qilishicha, bunda inson omiliga hojat qolmaydi va uyma-uy yurib pul yig‘ishga chek qo‘yiladi.

Hozirda uskunalar keltirilgan bo‘lib, bojxona ko‘rigi jarayonidan o‘tmoqda. Janubiy koreyalik mutaxassislar Toshkentga yetib kelishdi va ishni boshlashga shay. Loyihaning o‘zi xorij kompaniyasi mablag‘lari hisobiga amalga oshiriladi.

"Kommunal xizmatlarimiz ham ishni boshlashga tayyor: slesar va metrologlardan iborat ishchi brigadalari tayyorlangan. Biz qancha uzunlikdagi kabel va boshqa mahsulotlar ketishini ham hisoblab chiqqanmiz, xullas, hamma narsa tayyor", — dedi mutaxassis.

Yangiliklar lentasi
0