Nazarboyev Ostona markazi haqida: beti yuvilgan, keti esa teshik

TOShKENT, 21 apr — Sputnik. Qozog‘iston rahbari Nursulton Nazarboyev Ostona hokimi Aset Isekeshevga poytaxt markazidagi haroba uylarga ishora qilgan, deb xabar qilmoqda qozoq OAVlari.

Nazarboyev poytaxt hokimiga eski uylar aks etgan suratlarni ko‘rsatgan.

"Poytaxtimiz markazi qanday ko‘rinishdaligini ko‘rib qo‘ying. Qara. Ana u yoqda bizning mashhur opera teatrimiz, ko‘rapsanmi? Boshqa joylar ham bor, shahar markazida. (…) Biz nima haqda gapirapmiz? Sayyohlar o‘sha joylarga boradilar, suratga olib, butun dunyoga ko‘rsatadilar. Yuzini yuvib qo‘yganmizu, keti esa teshik, qara", — degan Nazarboyev.

"Kelinglar, chuqurroq ishlaylik. Agar shunga zarurat bo‘lsa, buning uchun maxsus mablag‘ ajratib, aynan hozirning o‘zida tartibga keltirish kerak. EXPO bahonasida "tozalanib" olish imkoniyati bor. Agar u bu yerda uylar qursa, unga arzonga tushadi. Kommunikatsiyalar, issiqlik ta’minoti, hamma sharoit muhayyo. Shaharning markaziy tumanlarini g‘arib turar-joylardan ozod etish lozim. Agar buning uchun Parlamentda maxsus qonun qabul qilish kerak bo‘lsa, kelinglar, shunday qilaylik. Chunki bu yer poytaxt, bu yerda butun mamlakat manfaati mujassam", — qo‘shimcha qilgan Nazarboyev.