TOShKENT, 7-may — Sputnik. Toshkentda 9-may — Xotira va qadrlash kunini nishonlash urush davri avtomobillari ko‘rgazmasi bilan boshlandi, deb xabar bermoqda Sputnik O‘zbekiston muxbiri.
"Anhor Lokomotiv" parkida tashkil etilgan mazkur tadbir barchada qiziqish uyg‘otdi. Toshkentliklarning aksariyati ko‘rgazmaga oilaviy tarzda tashrif buyurishdi.
Ikkinchi jahon urushi davrida frontdagi askarlarga taom tayyorlashda foydalanilgan g‘ildirakli oshxona tashrif buyurganlarning diqqatini o‘ziga jalb etdi.
Parkka kiraverishda mehmonlarni mamlakat tarixida ilk bor urush davri gimnastorkalarini kiygan qizlar kutib olishdi va bolalarga shar ulashishdi. Istagan kishi bu qizlar bilan rasmga tushishi mumkin edi.
Urush davrida aytilgan qo‘shiqlarning ijro etilishi tadbirga o‘zgacha fayz bag‘ishladi. Mashhur "Katusha" qo‘shig‘i ijro etilganida esa keksa onaxonlar davraga chiqib raqsga ham tushishdi.
Umuman olganda, bayram hamma xohlaganidek — urush davri qo‘shiqlari, o‘sha davr harbiylari kiyimidagi askarlar va urushda kim g‘alaba qozonganini bundan buyon bir umr yodida saqlaydigan yuzlab bolajonlarning ishtiroki bilan boshlandi.
