Samarqandga kelgan turistlar eng mashhur o‘zbek filmlarini tomosha qiladilar

TOShKENT, 16-may — Sputnik. Sayyohlarga badiiy va hujjatli filmlar namoyish qilinadi, deb xabar qildi "O‘zbekkino" milliy agentligi matbuot-xizmati.

"O‘zbekkino" Milliy agentligi Madaniyat vazirligi va Turizmni rivojlantirish davlat qo‘mitasi bilan hamkorlikda Samarqand shahriga tashrif buyuruvchi yurt fuqarolari hamda chet ellik sayyohlar uchun O‘zbekistonning boy madaniy me’rosi, an’analari, folklori, tarixiy shaxslari va obidalari hamda mustaqillik yillarida erishilgan yutuqlarni aks ettiruvchi turli hujjatli filmlar, shuningdek, "Oltin fond"ga kiritilgan tarixiy filmlar va xalqaro kinofestivallarda muvaffaqiyatli qatnashgan milliy badiiy filmlarning o‘zbek va rus tillarida (ingliz tilida subtitrlar bilan) maxsus namoyishi yo‘lga qo‘yilmoqda, deyilgan xabarda.

Bu maqsadda yuqoridagi mazvularda turli yillarda suratga olingan badiiy va hujjatli filmlar ro‘yxati shakllantirilib, "O‘zbekkino" Milliy agentligining ekspertlari tomonidan saralab olingani ta’kidlangan.

Filmlar shahardagi "Sharq Yulduzi" kinoteatri (Navoiy ko‘chasi, 40-uy); Samarqand shahar tarixi Afrosiyob muzeyi (Toshkent yo‘li ko‘chasi, 7-uy) hamda viloyat O‘lkashunoslik muzeyi (Jomiy ko‘chasi, 56-uy)da namoyish qilinadi.

Hozirgi kunda "Sharq Yulduzi" kinoteatri namoyishlarga tayyor holga keltirildi, qolgan obyektlarda tayyorgarlik ishlari olib borilmoqda, deb qo‘shimcha qilingan xabarda.

Qayd etilishicha, 2017-yilning ikkinchi yarmidan mazkur amaliy tajribani respublikaning boshqa turistik hududlarida ham yo‘lga qo‘yish rejalashtirilgan.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.