Lola Karimova "Lola sayli" bayrami haqida hikoya qildi

TOShKENT, 18-may — Sputnik. Lola Karimova-Tillayeva ijtimoiy tarmoqlardagi sahifasida o‘zbek xalq udumlaridan biri "Lola sayli" haqida ma’lumot berdi.

Lola sayli (Lolabayram, ayrim hududlarda Guli surx deya nomlanadi) — o‘zbek xalqining qadimiy bayramlaridan biri bo‘lib, Navro‘zdan so‘ng, ya’ni aprel oyining oxiri — may oyining boshlarida, lola va lolaqizg‘aldoq ochilgan vaqtlarda o‘tkaziladi.

Lola sayli bir necha ming yillik tarixga ega. Mazkur bayramni xalq tomonidan tanlangan "lolachilar" boshqarganlar. Ular o‘z do‘stlari bilan birga bayram vaqti va joyini aniqlab, xalqqa e’lon qilganlar. Bayram o‘tkazilishidan oldin lolachilar daraxt shohini kesib, uni lola bilan bezaganlar. Bayram kuni gullar bilan bezalgan daraxt shohini shahar markazi tomon ko‘pchilik bo‘lib olib o‘tganlar. Odamlar uylaridan chiqib, niyat qilib daraxt shohiga mato parchalari yoki ro‘molchalarni bog‘laganlar va lolachilarga ergashganlar. Bayram o‘yin kulgi, ashula-raqs bilan o‘tib, unda askiyachilar va dorbozlar ishtirok etganlar, polvonlar orasida kurash bellashuvlari ham o‘tkazilgan.

Buxoro hududida bayram arafasida savdogarlar do‘konlarini gullar bilan bezaganlar. Odatga ko‘ra, atirgul barglaridan murabbo pishirib, uni uyga kelgan mexmon oldiga dasturxonga tortganlar.

Lola sayli bizgacha yetib kelib, vatanimizning asosan tog‘li hududlarida nishonlanadi. Bayramning ramziy ma’nosi yo‘qolib ketgan bo‘lsa-da, xalq sayli va o‘yin-kulgi bilan nishonlash udumi saqlanib qolgan, deb yozadi Lola Karimova o‘zining instagrammdagi sahifasida.

Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.