TOShKENT, 31-may — Sputnik. Rossiya mehnat va bandlik federal xizmati (Rostrud) delegatsiyasi 31-maydan 3-iyunga qadar O‘zbekistonda bo‘ladi. Bu haqda O‘zbekiston Bandlik va mehnat munosabatlari vazirligi matbuot xizmati xabar berdi.
Rostrud delegatsiyasi tashrif doirasida Bandlik va mehnat munosabatlari vazirligi, tashqi mehnat migratsiyasi masalalari agentligi, Moliya vazirligi huzuridagi budjetdan tashqari pensiya jamg‘armasida uchrashuvlar o‘tkazishi rejalashtirilgan.
Delegatsiya bundan tashqari, Toshkentdagi ishsizlarni kasb-hunarga o‘qitish markazi, Samarqanddagi "MAN Auto-Uzbekistan" avtomobil zavodi hamda shahardagi ishsizlarni kasb-hunarga o‘qitish markaziga tashrif buyuradi.
Rossiya mehnat va bandlik federal xizmati Rossiya va O‘zbekiston o‘rtasidagi mehnat migratsiyasi bo‘yicha kelishuvlarni amalga oshirish borasidagi mas’uliyatli organ hisoblanadi. Rostrud ish beruvchilarning mehnat qonunchiligiga amal qilishlarini nazorat qiladi, Rossiyaga xorijdan ishchilarni jalb etish bo‘yicha takliflar tayyorlashda hamda kvotalar belgilashda ishtirok etadi.
