TOShKENT, 3-iyun — Sputnik. Anjuman doirasida o‘tkazilgan "MDH davlatlaridagi yilning eng yaxshi aeroporti" tanlovida Buxoro xalqaro aeroporti g‘olib bo‘ldi.
"O‘zbekiston havo yo‘llari" milliy aviakompaniyasi matbuot xizmatining xabar berishicha, aeroport "Aeroportni rivojlantirishga qo‘shilgan eng katta hissa uchun" yo‘nalishida diplom va kubok bilan taqdirlandi.
Qayd etish joiz, bu Buxoro aeroportining birinchi mukofoti emas. Aeroport 4-marta "MDH davlatlarining eng yaxshi aeroporti", 3-marta "Eng jadal rivojlanayotgan aeroport" va 2-marta "Istiqbolli rivojlanayotgan aeroport" mukofotiga sazovor bo‘lgan.
Buxoro aeroporti 1999-yilda xalqaro aeroport maqomini olgan. 2011-yilda aeroportda yangi aerovokzal majmuasi qurilgan. Aeroport 2016-yilda ISO 9001:2015 xalqaro muvofiqlik sertifikatini olgan.
Aeroport "Boeing", A-310/320/321, An-124 "Ruslan" va boshqa ko‘plab rusumlardagi samolyotlarni qabul qila oladi.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
