TOShKENT, 9-iyun — Sputnik. Shanxay hamkorlik tashkilotiga a’zo davlatlar rahbarlari Hindiston va Pokistonni a’zolikka qabul qilish haqidagi qarorni imzolashdi, shuningdek, ekstremizmga qarshi kurash bo‘yicha konvensiya imzolandi, deb xabar bermoqda RIA Novosti.
ShHTga a’zo davlatlar rahbarlarining kengaytirilgan tarkibdagi yig‘ilishida Rossiya, Qozog‘iston, Xitoy, Qirg‘iziston, Tojikiston va O‘zbekiston yetakchilari Hindiston va Pokistonni tashkilotga a’zolikka qabul qilish jarayoni nihoyasiga yetgani hamda ularga ShHTga a’zo davlat maqomini berish haqidagi qarorga imzo chekishdi.
Bundan tashqari, ekstremizmga qarshi kurash bo‘yicha ShHT konvensiyasi imzolandi va xalqaro terrorizmga qarshi birgalikda kurashish haqida ShHTga a’zo davlatlar rahbarlarining bayonoti qabul qilindi.
Eslatib o‘tamiz, Hindiston va Pokistonni ShHTga qabul qilish jarayoni 2015-yilda boshlangan edi.
