TOShKENT, 13-iyun — Sputnik. Xalq deputatlari Toshkent shahar kengashining 2-iyundagi qaroriga asosan Toshkent shahridagi 7 tumanda ko‘chalar nomlariga o‘zgartirishlar kiritilgan.
Mazkur qarorga ko‘ra, Bektemir, Yashnobod, Olmazor, Uchtepa, Yunusobod, Sergeli va Yakkasaroy tumanlaridagi ba’zi joy, ko‘chalarga yangi nom berilgan va qayta nomlangan.
Jumladan, Bektemir tumanidagi Bardonko‘l ko‘chasi Majnuntol ko‘chasi deb qayta nomlandi.
Yashnobod tumanidagi Pahlavon Mahmud-2 tor ko‘chasi — Pahlavon Mahmud ko‘chasi, M.Musaxonov 1-tor ko‘chasi —Pahlavon Mahmud tor ko‘chasi hamda M.Musaxonov 1 va 2-berk ko‘chalari — Pahlavon Mahmud 1 va 2-berk ko‘chalari deya qayta nomlandi.
Olmazor tumanidagi Yangi tor ko‘chalar Chuqursoy 6-7-8- tor ko‘chasi va Noraztepa 5-6-7-8-tor ko‘chasi deb nomlandi. Uchtepa tumanidagi Tuyatortar ko‘chasi Ko‘kcha Oqtepa ko‘chasi deb qayta nomlandi.
Yunusobod tumanidagi Bog‘ishamol va Yangishahar ko‘chalari oralig‘idagi yangi ko‘chaga Yangishahar ko‘chasi hamda Do‘rmon yo‘li va Bog‘ishamol ko‘chalari oralig‘ida tashkil topgan ko‘chaga Do‘rmon yo‘li ko‘chasi deb nom berildi. Shuningdek, Ahrorobod 2-berk ko‘chasi Ahrorobod tor ko‘chasi deb nomlandi.
Sergeli tumanidagi Yangi tor ko‘chalarga Savatchi 2-3-4-5-6-tor ko‘cha, Shohruhiya ko‘chasiga Samo ko‘chasi, Yangi berk ko‘chalarga Samo 1-2-berk ko‘chasi, Hamza ko‘chasi Favvora ko‘chasi deb nomlandi. Qo‘yliq-6 dahasidagi yangi ko‘chaga Nufuzli ko‘chasi deya nom berilgan ("Qo‘shqo‘rg‘on" mahallasi). Sayfi Olimov 1-berk ko‘chasi Qumariq 4-berk ko‘chasi deya qayta nomlangan (tutash ko‘cha nomlari uyg‘unlashtirilgan).
Yakkasaroy tumanidagi Fozilota qabristoni Yakkasaroy qabristoni deb ataladigan bo‘lgan.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
