TOShKENT, 19-iyun — Sputnik. FIFA referisi, o‘zbekistonlik hakam Ravshan Ermatov JCh-2018 musobaqasidan avval o‘tkaziladigan Konfederatsiyalar Kubogi-2017 turnirida videotakrorlar bo‘yicha referi assistenti vazifasini bajaradi. Bu haqda O‘zbekiston Futbol federatsiyasi matbuot xizmati xabar berdi.
O‘FF matbuot xizmati xabariga ko‘ra, Rossiyada bo‘lib o‘tayotgan turnirda Ravshan Ermatov birinchi tayinlov olgan. U B guruhi, 1-turidan o‘rin olgan Avstraliya — Germaniya uchrashuvida ishlaydi.
Ushbu musobaqalarda hakamlarga video-yordam tizimi (VAR) qo‘llaniladi. Yordamchilar, operatorlar xonasida joylashgan barcha video kameralarni kuzatadi va bosh hakamga zarur bo‘lgan ma’lumotlarni uzatib turadi. Bu o‘z navbatida hal qiluvchi vaziyatlarda hakamlik xatolarini to‘g‘rilashga yordam beradi.
Xususan, darvozalar oldidagi vaziyatlar, futbolchilarni o‘yindan chetlashtirish, penalti tayinlash yoki o‘yinchini aniqlashda foydalaniladi. Ammo, yakuniy qaror qabul qilish bosh hakam zimmasida qoladi.
