Svet va gaz avtomatik tarzda hisobga olinadi

TOShKENT, 21-iyun — Sputnik. O‘zbekiston Respublikasi Bosh prokuraturasi huzurida Majburiy ijro burosining Axborot-kommunikatsiya texnologiyalarini joriy etish markazi tashkil etiladi, deb xabar qildi O‘zbekiston prezidenti matbuot-xizmati.

Markaz 25 shtat birligidan iborat bo‘ladi, yana 42 ta shtat birligi Buro hududiy boshqarmalariga axborot-kommunikatsiya texnologiyalarini joriy etish bo‘limlarini barpo etish uchun ajratildi. Buroning axborot tizimlari boshqa tashkilotlar bilan integratsiya qilinadi.

Markazning vazifalari etib, Buroning avtomatlashtirilgan axborot tizimlari, resurslari va ma’lumotlar bazalarini yaratish, rivojlantirish va yuritish bo‘yicha yagona siyosatni, jumladan elektr energiyasi va tabiiy gazni avtomatlashtirilgan elektron hisobga olish va nazorat qilish tizimini ishlab chiqish hamda yuritish belgilangan.

Markaz Buroning yuridik shaxs maqomisiz mustaqil boshqarmasi hisoblanadi. Markaz direktori Buro direktorining takdimnomasi bo‘yicha Bosh prokuror tomonidan lavozimga tayinlanadi.

Markaz xodimlariga alohida mehnat sharoitlari uchun ularning lavozim maoshiga 100% miqdorida oylik ustama to‘lanadi. Ushbu summa boshqa ustamalar va mukofotlarni hisoblashda lavozim maoshi tarkibiga kiritiladi.

Markazga boshqa mutaxassislarni —dasturchilar, kompyuter tizimlari va tarmoqlari xavfsizligi, avtomatlashtirilgan tizimlarda ma’lumotlarni himoya qilish bo‘yicha mutaxassislar, kompyuter muhandislari, veb-dizaynerlar va boshqalarni shartnomaviy-huquqiy asosda jalb etishga ruxsat berildi. Mazkur qarorning ijrosini nazorat qilish O‘zbekiston Bosh vaziri Abdulla Aripov va O‘zbekiston Bosh prokurori I. Abdullayev zimmasiga yuklatildi.