TOShKENT, 29-iyun — Sputnik. O‘zbekiston prezidenti Shavkat Mirziyoyev Markaziy Osiyoda samarali va konstruktiv mintaqaviy siyosat olib bormoqda, degan xulosaga keldi AQShning nufuzli tadqiqot markazlaridan biri "Jamestown Foundation". Bu haqda "Jahon" AA xabar bermoqda.
"Ushbu mamlakat bilan hamkorlik ko‘lamini kengaytirish O‘zbekiston rahbariyatining turli darajadagi aloqalarni yo‘lga qo‘yish borasida yangicha qarashlarga ega ekanining natijasidir, — deb yozadi "Jamestown Foundation". — Prezident Shavkat Mirziyoyev o‘zining afg‘on hamkasbi bilan to‘g‘ridan-to‘g‘ri shaxsiy, shu jumladan, xalqaro forumlar sahnasidagi aloqasini yoqlaydi". Shu o‘rinda ikkala davlat rahbarining shu yil 8-iyun kuni bo‘lib o‘tgan Shanxay Hamkorlik tashkilotining Ostona sammiti doirasidagi barcha yo‘nalishlarda sheriklik munosabatlarini mustahkamlash masalalari muhokama qilingan uchrashuvi yodga olinadi.
Markaz shuningdek, 2017-yil yanvar oyida O‘zbekiston Tashqi ishlar vaziri Abdulaziz Komilov Kobulga tashrif buyurgani va Afg‘oniston rahbariyati bilan muzokaralar olib borgani haqida to‘xtaladi.
O‘zbekistonning mazkur davlat bilan aloqalarni sifat jihatidan yangi bosqichga ko‘tarish masalasida qat’iyligining yana bir misoli sifatida joriy yilda O‘zbekiston prezidentining Afg‘oniston bo‘yicha maxsus vakili lavozimining tashkil etilganiga e’tibor qaratiladi. "Jamestown Foundation" mutaxassislarining e’tirof etishlaricha, "bu rasmiy Toshkentning Afg‘onistonda tinchlik va barqarorlikka erishish bo‘yicha xalqaro sa’y-harakatlarda faol o‘rin tutishini namoyon etadi".
Maqolada O‘zbekiston Tashqi savdo vaziri Elor G‘aniyevning so‘zlaridan iqtibos keltirilib, ikkala mamlakatda ham o‘zaro tovar aylanmasini ayni kundagi 500 million AQSh dollaridan 2017-yilning oxiriga qadar 1 milliardga yetkazish uchun barcha imkoniyatlar mavjudligi haqida xabar beriladi.
"Shu yilning yanvar oyida Kobul shahrida O‘zbekiston Savdo uyi ochildi va bu yerda muntazam ravishda Afg‘onistonga shimoliy qo‘shni davlatda ishlab chiqarilgan mahsulotlar ko‘rgazmasi o‘tkaziladi, — deyiladi maqolada. — Darvoqe, O‘zbekiston Afg‘oniston bilan temir yo‘l orqali bog‘langan yagona davlat hisoblanadi hamda bu yo‘l orqali o‘lkaga neft va gaz sanoati mahsulotlari, qurilish materiallari, qishloq xo‘jalik texnikalari, dori-darmonlar va boshqa tovarlarni yetkazib beriladi".
"Toshkent Turkmaniston-O‘zbekiston-Qozog‘iston-Xitoy gaz quvuri qurilishida orttirilgan ulkan tajribaga ega, — deyiladi maqolada. — Ayni paytda, o‘zbek kompaniyalari ishtirokida Afg‘onistonda uchta yo‘nalish qurilgan". Shundan kelib chiqqan holda, amerikalik mutaxassislar xulosasiga ko‘ra, O‘zbekiston ushbu mamlakatda yana bitta keng ko‘lamli loyihani amalga oshirishi uchun yetarli tajriba va ko‘nikmaga egadir.
Bizning Telegramdagi o‘zbekcha kanalimizga obuna bo‘ling va eng yangi xabarlarni birinchi bo‘lib o‘qing.
