TOShKENT, 19-iyul — Sputnik. Gaz hisoblagichlari aholiga "O‘ztransgaz" kompaniyasi hisobidan kreditga beriladi, deb xabar qildi Sputnik O‘zbekiston muxbiriga kompaniya vakili.
"Hozirgi kunda buni amalga oshirish bo‘yicha "O‘ztransgaz"ning ichki buyrug‘i ishlab chiqilyapti. Ushbu buyruqda gaz hisoblagichlarni o‘rnatish muddati va to‘lov narxi ko‘rsatiladi. Gaz hisoblagichlar markazlashgan holda kompaniya tomonidan o‘rnatiladi", dedi kompaniya vakili.
U shuningdek, aholiga bu haqda ogohlantirish yuborilishini qo‘shimcha qildi.
Eslatib o‘tamiz, bugun o‘zbek OAVlarida gaz hisoblagichlarini o‘rnatmagan maishiy iste’molchilar uchun ikki barobar to‘lov bekor qilingani xabar qilingan edi.
"O‘ztransgaz" kompaniyasi vakili 1-oktabrdan kuchga kirishi kerak bo‘lgan qarorning mazkur bandi haqiqatda bekor qilinganini tasdiqladi.
Shu tariqa, gaz hisoblagichini o‘rnatmagan maishiy iste’molchilar to‘lovni belgilangan tarif bo‘yicha to‘lashda davom etadilar.
