TOShKENT, 5 avg — Sputnik. Yaqinda fosh etilgan GM Uzbekistan mashinalarini sotish bilan bog‘liq yirik jinoiy sxema voqeasidan so‘ng kompaniya sotuv tizimini takomillashtirishga qaror qildi.
Kompaniya bu haqda o‘z rasmiy saytida axborot bergan.
GM Uzbekistan bergan xabarga ko‘ra ayni vaqtda kompaniya tomonidan ishchi guruh tuzilgan bo‘lib, ular avtomobillar sotuvi tizimini takomillashtirish bo‘yicha chora-tadbirlar ishlab chiqishadi.
Kompaniya xabar berishicha tashkiliy choralar doirasida dilerlik korxonalarini xodimlari attestatsiyadan o‘tkazilib, iste’molchilarga avtomobilni realizatsiya qilish bevosita vazifasiga kiruvchi ishchilar tarkibini qayta ko‘rib chiqish va kuchaytirish rejalashtirilmoqda.
Eslatib o‘tamiz, ilgariroq Sirdaryo viloyati MXX xodimlari Bosh prokuratura huzuridagi Departament xodimlari bilan hamkorlikda GM Uzbekistan avtomobillarini sotishda tovlamachilik bilan shug‘ullangan "Sirdaryoavtotexxizmat" MChJ avtosaloni direktori Abdumurod Haqberdiyevni qo‘lga olishgani haqida xabar bergan edik.
Haqberdiyev Ikkinchi jahon urushi faxriysining "Kaptiva" avtomobili olish uchun imtiyozli sertifikatidan foydalanish evaziga faxriyga 10 million so‘m berishni va’da qilgan. Haqberdiyev urush faxriysiga 9-May bayrami munosabati bilan taqdim etilgan sertifikatni boshqa odam nomiga rasmiylashtirmoqchi bo‘lgan. Haqberdiyev mashinani bozor bahosidan ancha arzon sotib olish imkonini beruvchi tovlamachilik sxemasini yaratgan. U bu xizmati uchun mashina narxining 50% qismini pora sifatida olgan.
