TOShKENT, 14 avg — Sputnik. Toshkent vaqti bilan 9:00da Xalq banki xodimi Oloy bozorida bankomat faoliyatini "ishga tushirdi". Bankomatlarni to‘ldirish uchun naqd pullar maxsus konteynerlarda olib kelindi. Bank vakili apparatning dasturlash ta’minotini ishga tushirgach, ilk foydalanuvchi plastik kartadan pul yechib oldi, deb xabar qilmoqda "Uz24uz".
Xabarda aytilishicha, naqd pulni yechib olish jarayoni 1,5-2 daqiqa vaqtni talab etadi. Bitta kartadan hech qanday komissiyasiz 100 ming so‘mgacha pul yechib olish mumkin. Pullar 10 ming, 5 ming va 1 ming so‘mlik kupuralarda berilmoqda.
"Ushbu bankomat ertalab 9:00dan kech 18:00ga qadar ishlaydi. Kun davomida bu yerda taxminan 200-300 kishi naqd pul yechib olishi mumkin", — deb aytgan Xalq banki Yunusobod filiali plastik kartalar bo‘limi xodimi G‘ayratjon Xudoyorov.
Xudoyorovning so‘zlariga ko‘ra, bir foydalanuvchi 100 ming so‘mlik limitga qat’iy amal qilgan taqdirda bir necha kartalardan naqd pul yechib olishi mumkin.
Xalq banki odamlar ko‘p yig‘iladigan joylarda ham bankomatlarni o‘rnatishni rejalashtirmoqda — ular sutkada 24 soat ishlashi xabar qilinmoqda.
