TOShKENT, 19 avg — Sputnik. Samarqandda ibratli to‘y o‘tkazildi: kelin-kuyov va ularning do‘stlari uchta mashinada borib, nikohdan o‘tib keldi, dasturxonga spirtli ichimlik qo‘yilmagan. "Sevgi tarixi", "vals" degan ortiqcha marosimlar o‘tkazilmadi, deb xabar bermoqda "Zarafshon" nashri.
Taklifni ma’qullagan Muhabbat opa "faqat uchrashuv emas, ixcham to‘y qilib, namuna ko‘rsatamiz", — deb aytgan.
Shu tariqa mahalla faolllari mahallada to‘y o‘tkazishga qiynalib turibgan oilalar bilan uchrashib, tashabbusdan ularni xabardor qilishgan. Bitta nikoh va uch nafar bolaning xatna to‘yini o‘tkazishga tumandagi korxona va tashkilotlar, mahalla tadbirkorlari yordam beradigan bo‘lgan.
Shu tariqa mahallada avtomobil tuzatish ustaxonasida ishlaydigan Aktam Qarshiyevning nikoh to‘yi va yana uch oila bolalarining xatna to‘yini ularning yaqin qarindoshlari, mahalla faollari — 250 kishini taklif etib o‘tkazilgan.
O‘zbekiston yoshlar ittifoqi viloyat kengashi vakillari yangi yosh oilaga televizor sovg‘a qildi.
"Turmush o‘rtog‘im bilan unashtirilganimizga ancha bo‘ldi, — degan Aktam Qarshiyev. — Lekin 300-400 kishiga dasturxon yozish qiyin bo‘lib ketgani uchun to‘yimizni o‘tkazishga imkon topolmayotgan edik. Mahalla va yoshlar ittifoqining tashabbusi bilan to‘yimiz namunali tarzda o‘tkazib berilganidan xursandmiz. To‘yga sarflashimiz kerak bo‘lgan mablag‘ni endi ro‘zg‘orimiz kam-ko‘stini to‘ldirishga ishlatamiz".
