TOShKENT, 21 avg — Sputnik. O‘zbekiston prezidenti Shavkat Mirziyoyev 18-avgust kuni Bekobod shahriga uyushtirgan tashrifi chog‘ida shahar faollari bilan uchrashuv o‘tkazdi.
Uchrashuv haqda ko‘rsatuv Uzbekiston 24 telekanali orqali namoyish qilindi.
Bekobod shahrida prezident Mirziyoyev valyuta ayirboshlash siyosatida katta ishlar qilinayotgani va bu jarayon og‘ir bo‘layotganini e’tirof etgan.
"Biz monitar siyosatimizda katta-katta ishlarni boshladik. Valyutamizni ayirboshlash, eng katta narsa — so‘mimizni dunyo bozoriga chiqarish bo‘yicha. Bo‘layapti, lekin og‘ir bo‘layapti. Og‘ir bo‘ladi. Bu oson ishlar emas. Yetti marta o‘lchab bir marta kesadigan narsalar. 33 million xalq orqamizda turibdi. Nevaralarimizning taqdiri bu", — degan prezident Shavkat Mirziyoyev.
"Bag‘rimiz kengroq bo‘lishi kerak, bizga yarashadi. Kechirimli xalq, kechirimli rahbar bo‘lishimiz kerak. Biz kichkina-kichkina mayda gaplarga aralashib, fisqu-fasod gaplardan yiroq bo‘lishimiz kerak. Ana shunda Xudo taolo o‘z barakasi, marhamatini ayamaydi, yurtimiz obod bo‘ladi", — degan Shavkat Mirziyoyev.
