TOShKENT, 27 avg — Sputnik. Shavkat Mirziyoyev Samarqand viloyatiga tashrif uyushtirdi, deb xabar qilindi O‘zbekiston prezidenti rasmiy saytida.
Xabarga ko‘ra, Mirziyoyev Samarqand viloyatiga tashrifini Hazrati Xizr majmuasidagi O‘zbekistonning Birinchi prezidenti Islom Karimov qabrini ziyorat qilishdan boshlagan.
Mirziyoyev Islom Karimov maqbarasida olib borilayotgan qurilish va obodonlashtirish ishlari bilan tanishgan.
Eslatib o‘tamiz, Shavkat Mirziyoyev tashabbusi bilan Samarqanddagi Hazrati Xizr majmuasida juda katta hajmdagi qurilish, hududni obodonlashtirish ishlari olib borilmoqda. Majmua loyihasi takomillashtirilib, maqbara granit va marmar bilan qoplangan. Maqbara peshtoqi va unga tutash ayvon milliy naqshlar asosida bezatilib, unga Qur’oni Karim oyatlari bilan birga Islom Karimovning hikmatli so‘zlari bitilgan.
Mirziyoyev majmuada olib borilayotgan ishlarni mantiqiy yakuniga yetkazish, ziyoratchilarga tegishli sharoitlar yaratish, unga yondosh qabristonni obod qilish bo‘yicha o‘z tavsiyalarini bergan.
Mirziyoyevning Samarqand viloyatiga tashrifi davom etmoqda.
