TOShKENT, 29 avg — Sputnik. Ostona shahrida ikki mamlakat o‘rtasidagi hukumatlararo kelishuv doirasida xalqaro avtomobil tashuvlari bo‘yicha qozoq-o‘zbek qo‘shma komissiyasi yig‘ilishi bo‘lib o‘tdi. Bu haqda Qozog‘iston investitsiya va taraqqiyot vazirligi matbuot xizmati xabar berdi.
Xabarda aytilishicha, tomonlar O‘zbekiston va Qozog‘iston o‘rtasidagi yuk tashishlar hajmi bo‘yicha ma’lumot almashishgan va joriy yilda o‘zaro yuk tashish hajmi oshganligini qayd etishgan.
"Tomonlar shuningdek, Qozog‘iston va O‘zbekiston o‘rtasida muntazam avtobus yo‘nalishlarini ochish masalasini muhokama qildi va dastlabki bosqichda Chimkent-Toshkent yo‘nalishi bo‘yicha muntazam avtobus qatnovi bo‘yicha ish olib borishga kelishib oldi", vazirlik matbuot xizmati xabarida.
Vazirlikning ma’lumot berishicha, 2017-yilning birinchi yarim yilligida ikki mamlakat o‘rtasida avtomobilda yuk tashish hajmi 11%ga oshgan va 169,5 ming tonnani tashkil etgan. Avtotransportda tashilgan yuklarni asosan tekstil, gilam, matolar, sabzavot va mevalar, plastmassa mahsulotlari, mexanizm va asbob-uskunalar tashkil etadi.
