O‘zbekiston va Qirg‘iziston yana chegara masalasida uchrashdi

TOShKENT, 27 sen — Sputnik. Joriy yilning 21-27-sentabr kunlari Qirg‘izistonning Botken shahrida O‘zbekiston-Qirg‘iziston Davlat chegarasini delimitatsiya va demarkatsiya qilish masalalari bo‘yicha ikki davlat Hukumatlari delegatsiyalari ishchi guruhlarining navbatdagi uchrashuvi bo‘lib o‘tdi, deb xabar qildi O‘zbekiston TIV matbuot-xizmati.

Uchrashuvda Shavkat Mirziyoyevning shu yil 5-6-sentabrdagi Qirg‘izistonga davlat tashrifi davomida tuzilgan O‘zbekiston-Qirg‘iziston Davlat chegarasini delimitatsiya qilish bo‘yicha Shartnomada keltirilmagan chegaradagi boshqa uchrastkalarni belgilash davom ettirildi, deyilgan xabarda.

Eslatib o‘tamiz, 5-6 sentabr kunlari O‘zbekiston prezidenti Shavkat Mirziyoyevning Qirg‘izistonga uyushtirgan davlat tashrifi davomida Qirg‘iziston prezidenti Almazbek Atambayev jurnalistlarga murojaat qilib, "bu — tarixiy uchrashuv bo‘ldi" deb aytgan va ikki davlat o‘rtasida chegaraning 85 %i belgilab olingani, 15 %gina kelishilmagan qismi qolganini ma’lum qilgan.

Atambayev, shuningdek, O‘zbekistonga uyushtiradigan safarigacha bo‘lgan muddat ichida barcha chegara punktlari maksimal darajada ochiq bo‘lib, odamlar ular orqali erkin harakatlanishlariga erishamiz", deb umid bildirgan edi.