TOShKENT, 6 okt — Sputnik. O‘zbekiston prezidenti Shavkat Mirziyoyevning taklifiga binoan davlat tashrifi bilan Toshkentda bo‘lgan prezident Almazbek Atambayev bugun Qirg‘izistonga jo‘nab ketdi.
Avval xabar qilinganidek, tashrifning asosiy tadbirlari 5-oktabr kuni bo‘lib o‘tdi.
Almazbek Atambayev Shavkat Mirziyoyev hamrohligida Mustaqillik maydoniga tashrif buyurdi. Prezidentlar "O‘zekspomarkaz"da tashkil etilgan Qirg‘iziston milliy mahsulotlari ko‘rgazmasi bilan tanishdilar.
Ko‘ksaroy qarorgohida bo‘lib o‘tgan muzokaralarda O‘zbekiston va Qirg‘iziston o‘rtasidagi savdo-iqtisodiy, investitsiyaviy hamkorlikni yanada rivojlantirish, transport-kommunikatsiya, energetika, qishloq xo‘jaligi, madaniy-gumanitar va boshqa sohalardagi aloqalarni yanada mustahkamlash masalalari muhokama qilindi, qator hujjatlar imzolandi.
