TOShKENT, 17 okt – Sputnik. AQShning O‘zbekistondagi elchixonasi huquq himoyachisi G‘anixon Mamatxonovning ozod etilishi yuzasidan bayonot berdi.
Bayonotda bildirilishicha, bu voqea yaqindagina bir necha vijdon tutqunlari ozodlikka chiqarilishidan keyingi yana bir yangilik bo‘lib, u O‘zbekiston hukumati xalqaro inson huquqlarini himoya qilish andozalariga sodiqligini namoyish etuvchi qo‘shimcha ijobiy qadam bo‘ldi.
Ma’lumotlarga ko‘ra, G‘anixon Mamatxonov 2009-yilda qamoqqa olingan bo‘lib, u Farg‘ona vodiysida fermerlar huquqlarini himoya qilib, bolalar mehnatidan foydalanishga qarshi kurashib kelgan.
"Amerika Qo‘shma Shtatlari Prezident Mirziyoyev olib borayotgan siyosiy, iqtisodiy, ijtimoiy va inson huquqlari borasidagi islohotlarga bo‘lgan sadoqatni qo‘llab-quvvatlovchi kelgusi qadamlarni kutib qoladi", — deyiladi bayonotda.
