TOShKENT, 2 noya – Sputnik. Rossiya bosh vaziri Dmitriy Medvedevning tashrifi doirasida O‘zbekiston va Rossiya o‘rtasida qator hujjatlar imzolandi, deb xabar bermoqda RIA Novosti.
Xabarga ko‘ra, Rossiya Mehnat va bandlik federal xizmati va Tashqi mehnat migratsiyasi masalalari agentligi o‘rtasida kelishuv, "Rosatom" davlat korporatsiyasi va O‘zbekiston Fanlar akademiyasi o‘rtasida atom energiyasidan tinchlik maqsadlarida foydalanish borasida hamkorlik qilish haqidagi memorandum, "TVEL" AJ va O‘zbekiston Fanlar akademiyasining Yadro fizikasi instituti o‘rtasida VVR-SM tadqiqot reaktori uchun yoqilg‘i ishlab chiqarish va yetkazib berish bo‘yicha shartnoma imzolandi.
Shuningdek, "Sho‘rtan gaz-kimyo majmuasining tozalangan metani negizida sintetik suyuq yoqilg‘i (GTL) ishlab chiqarishni tashkil etish" loyihasini moliyalashtirishni tashkillashtirish bo‘yicha, "Jizzax viloyatida neftni qayta ishlash majmuasini qurish" investitsion loyihasini moliyalashtirish haqida, Rossiya eksport markazi va "O‘zsanoatqurilishbank" ATB o‘rtasida hamkorlik va kredit limitini o‘rnatish haqidagi bitimlar imzolandi.
Bundan tashqari, O‘zbekiston Tashqi savdo vazirligi va Rossiya Sanoat va savdo vazirliklari o‘rmon sanoati majmuasi va ishlab chiqarish chiqindilarini qayta ishlash texnologiyalari sohasida o‘zaro anglashuv memorandumlarini imzoladi.
Kamaz va "O‘zavtosanoat" hamkorlik haqida shartnoma tuzdi.
"o‘zqurilishmateriallari" va Yevrotsement grup quruq usulda quvvati yiliga 160 million dollarlik 2,4 million tonna miqdorida sement ishlab chiqariladigan yangi zavod qurilishi bo‘yicha investitsion loyihani amalga oshirish tartibi haqida bitim imzoladi.
O‘zbekiston Tiklanish va taraqqiyot fondi va Gazprombank o‘rtasida O‘zbek-Rossiya strukturaviy moliyalash markazini tashkil etish to‘g‘risida bitim imzolandi.
Eslatib o‘tamiz, Dmitriy Medvedev bugun ikki kunlik davlat tashrifi bilan Toshkentga keldi.
