TOShKENT, 2 noya — Sputnik. Amerika Qo‘shma Shtatlarda istiqomat qilib kelayotgan bloger Nodir Zokirov Facebookdagi sahifasida O‘zbekiston bilan yaxshi tanish bo‘lgan amerikalik diplomatlarning fikrlari bilan bo‘lishgan.
Nyu Yorkda bo‘lib o‘tgan mudhish terrorchilik hujumidan keyin O‘zbekistonda ishlagan amerikalik diplomat, o‘zbekistonliklar haqida o‘z fikrini bildirgan.
"Bugun O‘zbekiston nomi yangiliklarda, afsuski, ijobiy ma’noda emas. OAVlar, kechagi avtomashina yordamida uyushtirilgan va sakkiz odamning umriga zomin bo‘lgan xujum haqida yozarkan, qotilning O‘zbekistondan ko‘chib kelganiga urg‘u berishapti.
2001 yil 11-sentabr fojeasi yuz berganda men Toshkentda edim. O‘shanda o‘zbekistonliklar yurtimizda bo‘lgan fojeadan keyin bizga ko‘rsatgan hamdardlik va mehr-oqibatni hech esdan chiqarmayman. Hujum bo‘lib o‘tganidan bir necha soat ichida Amerika elchixonasi gullar va hamdardlik maktublariga to‘lib ketgan. O‘zbekistonliklar men va rafiqam bilan ko‘rishganda bo‘lgan mudhish voqea yuzasidan afsusda ekanliklarini bildirishardi. Qurbon bo‘lganlar ichida o‘zbeklar ham bor edi.
AQSh grin karta lotereyasi ko‘plab o‘zbekistonliklar bu yerga ko‘chib kelishiga imkon yaratadi. Ular juda mehnatkash, vatanparvar odamlar va ular bizning ko‘pmillatli jamiyatimizni yanada boyitib yurishadi. Bir ahmoq inson qilmishlarini u kelib chiqqan millat bilan bog‘lash noto‘g‘ri. Shuningdek, bu fojeadan foydalanib, grin karta lotereyasiga tahdid solish ham uyatdir", — deb yozgan AQSh diplomati Mark Asquino.
Yana bir O‘zbekistonda xizmat qilgan amerikalik diplomat ham o‘z firklarini quyidagicha bildirgan.
"O‘zbekiston mehr-oqibatli va iliq insonlar yashaydigan go‘zal mamlakat. Buni bilishimga sabab men u yerda yashaganman. Mamlakat obro‘si uning eng zo‘r insonlari bilan belgilanadi, eng yomonlari bilan emas", — deb yozgan Facebook dagi sahifasida Casey Talk.
Eslatib o‘tamiz, seshanba kuni Nyu-York markazida, kelib chiqishi o‘zbekistonlik bo‘lgan Sayfulla Soipov yuk avtomobilida terakt uyushtirigan edi. Uning oqibatda 8 kishi qurbon bo‘lgan va 10 dan ortiq kishi jarohatlangan edi.
