TOShKENT, 2 noya — Sputnik. Toshkent metropolitenida shu yil yakunigacha yo‘lkira haqi oshirilmaydi, deb xabar qildi Sputnik muxbiri.
"Shu yil yakuniga qadar metro yo‘lkira haqini oshirish niyatimiz yo‘q. Metropoliten eng ommabop transport turi hisoblanadi. Shuning uchun to‘lov tariflarini bir maromda ushlab turishga harakat qilyapmiz. Ushbu transport turiga yo‘lovchi tashish avtobuslari ham kiradi. Shuning uchun hozircha tariflar oshirilishi haqida hech qanday gap so‘z yo‘q", — dedi "Toshkent metropoliten" DU bosh injeneri Baxtiyor Sodiqov.
Sadiqov "Lekin hukumat tomonidan yoqilg‘i mahsulotlarining narx oshirilsa, o‘z-o‘zidan metro yo‘lkira haqi ham o‘zgaradi", — deb qo‘shimcha qildi.
Eslatib o‘tamiz, 9-martdagi Vazirlar Mahkamasi va Toshkent shahar hokimligining "Toshkent metropolitenida pensionerlarga bepul xizmat ko‘rsatish to‘g‘risida"gi qaroriga asosan Toshkent metropolitenida harakatlanish pensionerlar uchun soat 10:00dan soat 16:00gacha bepul bo‘lgandi.
Bundan tashqari, Toshkent metrosida "Mikroelektronika Plyus" mahalliy korxonasi tomonidan yo‘lkira haqini to‘lashning avtomatlashtirilgan tizimi tatbiq etilmoqda. Loyihaning dastlabki bosqichida Mustaqqillik maydoni metro bekati test sinovlari tariqasida maxsus turniket va bir martalik chipta sotuvchi avtomatlar bilan jihozlandi.
