IIV Akademiyasi oʻqishga qabul eʼlon qildi

TOSHKENT, 15 noya — Sputnik. Oʻzbekiston Respublikasi oliy harbiy taʼlim muassasalari yoshlarni oʻqishga taklif qilmoqda, deb xabar qildi Toshkent shahar IIBB matbuot-xizmati.

2018/2019 oʻquv yili uchun Oʻzbekiston Respublikasi oliy harbiy taʼlim muassasalari yaʼni Ichki ishlar vazirligining Akademiyasi va Yongʻin xavfsizligi instituti hamda Milliy gvardiyaning Harbiy texnika institutlariga oʻqishga kirish istagida boʻlgan, Toshkent shahrida doimiy roʻyxatda turib, istiqomat qiluvchi, oʻrta va oʻrta-maxsus maʼlumotga ega boʻlgan hamda kollej va litseylarni bitiruvchi yoshlar 2017 yilning 15 noyabr kunidan 2018 yilning 15 fevral kuniga qadar, Toshkent shahar IIBB Kadrlar boshqarmasiga bevosita boʻysunuvchi Kasbiy tayyorgarlik markaziga hujjatlarni topshirish uchun taklif qilinadilar.

Vazirlikning amaldagi meʼyoriy buyruq talablariga asosan, Oʻzbekiston Respublikasi Oliy harbiy taʼlim muassasalariga kirish uchun fuqarolarning yoshi 17 yoshdan 23 yoshgacha boʻlishi, koʻrsatib oʻtilgan boʻlib, nomzodlarning yoshi oʻqishga qabul yilining 31 dekabriga qadar hisoblanadi.

Shuningdek, oʻgʻil bolalarning boʻyi 170 smdan past boʻlmasligi, qizlarning boʻyi esa 165 smdan past boʻlmasligi shart.

Oʻgʻil bolalar oʻzlari bilan pasport, chaqiruv yoki harbiy guvohnoma va maʼlumoti toʻgʻrisida hujjatlari (diplom, shahodatnoma), qizlar esa pasport va maʼlumoti toʻgʻrisida hujjatlari (diplom, shahodatnoma) olib kelishlari soʻraladi. Qabul har haftaning dushanba kunidan juma kuniga qadar soat 09:00 dan 17:00 ga qadar Toshkent shahar IIBB Kadrlar boshqarmasiga bevosita boʻysunuvchi Kasbiy tayyorgarlik markazida amalga oshiriladi.