TOShKENT, 17 noya — Sputnik. O‘zbekiston prezidenti Shavkat Mirziyoyev Sergeli tumani 6-A mavzesida barpo etilgan 61-oilaviy poliklinika faoliyati bilan tanishdi, deb xabar qildi prezident matbuot xizmati.
Xabarda aytilishicha, uch qavatli, 250 qatnovga mo‘ljallangan oilaviy poliklinikada ultratovush tashxisi, raqamli rentgen, elektrokardiograf, fizioterapiya, klinik va biokimyo laboratoriya bo‘limlari, kunduzgi shifoxona faoliyati yo‘lga qo‘yilgan.
Terapevt, pediatr, jarroh, otolaringolog, okulist, nevrolog, immunolog kabi tor soha mutaxassislari tomonidan aholiga malakali tibbiy xizmat ko‘rsatish uchun barcha sharoit yaratilgan.
Oilaviy poliklinikadagi asosiy yangiliklardan biri — bu bemorlar navbatga yozilishi uchun elektron tizim joriy qilingan. Ya’ni bemor shifokor qabuliga poliklinikaga kelmasdan turib, internet yoki telefon orqali ro‘yxatxonada o‘rnatilgan tizim yordamida navbatga kiritiladi. Bu ortiqcha ovoragarchilik va vaqt sarflashning oldini oladi.
Prezident ushbu tizimni 61-oilaviy poliklinika misolida namunaviy qilib Toshkentdagi barcha birlamchi tibbiyot muassasalariga joriy etish yuzasidan topshiriqlar berdi.
