Rossiyaga fohishalarni jo‘natib turgan fuqaro Toshkent aeroportida qo‘lga olindi

TOShKENT, 21 noya — Sputnik. Uch nafar o‘zbekistonlik ayolni Rossiyaga fohisha sifatida ishlatish maqsadida yubormoqchi bo‘lgan fuqaro Toshkent halqaro aeroportida ushlandi, deb xabar qildi Toshkent shahar IIBB matbuot-xizmati.

Xabarda aytilishicha, muqaddam sudlangan Berdiyeva Mubarak, fuqarolar N.E.Olimova, N.X.Bo‘riyeva va M.X.Nosirovalarni Rossiya Federatsiyasida fohishalik bilan shug‘ullanib, katta miqdordagi daromad olish bilan qiziqtirgan. U bu uch ayolni fohisha sifatida ishlatish maqsadida Rossiyaga yubormoqchi bo‘lgan vaqtida, huquqni muxofaza qiluvchi organ xodimlari tomonidan Toshkent halqaro aeroportida ushlangan.

Mazkur holat yuzasidan Chilonzor tumani IIB huzuridagi Tergov bo‘limi tomonidan O‘zbekiston Respublikasi JKning 135-moddasi 2-qismi "b" bandi (odam savdosi, ya’ni ikki yoki undan ortiq shaxslarni ulardan foydalanish maqsadida yollash) alomatlari bilan jinoyat ish qo‘zg‘atilgan.

O‘tkazilgan dastlabki tergov davomida fuqaro Berdiyeva ko‘rsatib o‘tilgan ayollardan tashqari fuqarolar M.I.Yuldasheva, Sh.K.Muminova, G.I.Maxmudova, D.A.Mirkarimova va I.U.Rasulovalarni ham fohisha sifatida ishlatishlik uchun Rossiya Federatsiyasiga yuborganligi aniqlangan.

Hozirda jinoyat ishi bo‘yicha dastlabki tergov harakatlari davom ettirilib, M.K.Berdiyevaning boshqa jinoyatlarga aloqadorligi tekshirilmoqda.

Jabrlanuvchilarning anketa ma’lumotlari o‘zgartirilgan bo‘lib, familiyasi va ismining har qanday o‘xshashligi tasodifiy harakterga ega.