Koreyada O‘zbekiston prezidenti Shavkat Mirziyoyev haqida kitob chop etildi

TOShKENT, 23 noya — Sputnik. Koreya Respublikasida O‘zbekiston prezidenti Shavkat Mirziyoyev faoliyatining birinchi yili haqida koreys tilida "O‘zbekiston Respublikasi Prezidenti Shavkat Mirziyoyev" nomli kitob chop etildi, deb xabar qildi O‘zbekiston Hukumat portali.

50 ming nusxada chop etilgan ushbu kitob 8 bo‘lim, 320 sahifadan iborat bo‘lib, ko‘plab suratlar bilan boyitilgan.

Nashrda Shavkat Mirziyoyevning avval O‘zbekiston Respublikasi prezidenti vazifasini bajaruvchi, so‘ng prezident sifatidagi faoliyati haqida batafsil ma’lumot berilgan. Davlat rahbarining mamlakat va xorijda so‘zlagan nutqlari, jumladan, prezident lavozimiga kirishish marosimi, Konstitutsiya bayrami, Yangi yil bayrami, BMT Bosh assambleyasi sessiyasidagi nutqidan iqtiboslar keltirilgan.

Kitobda Shavkat Mirziyoyev tashabbusi bilan barcha sohalarda boshlangan juda muhim islohotlar tahliliga katta e’tibor qaratilgan. Iqtisodiyotning liberallashuvi, xorijiy investitsiyalarni jalb qilish va himoyalash bo‘yicha aniq chora-tadbirlar, valyuta bozorini liberallashtirish, aholining ijtimoiy himoyasi, viloyatlarga nisbatan yangi siyosat, so‘z erkinligi va konstitutsiyaviy huquq tamoyillarini himoya qilish, bularning barchasi Mirziyoyev tashabbusi bilan boshlangan yangi islohotlarning dastlabki natijalaridir.

Kitobning "2017-2021 yillarda O‘zbekistonni rivojlantirishning beshta ustuvor yo‘nalishi bo‘yicha Harakatlar strategiyasi" nomli bobida ushbu dastur chuqur tahlil qilgan.

Shuningdek, O‘zbekiston prezidentining tashqi siyosatdagi mintaqaviy hamkorlikning yangi sur’atiga turtki bo‘lgan, O‘zbekistonning qo‘shni davlatlar bilan aloqalarini yangi bosqichga olib chiqqan tashabbuslari haqida so‘z yuritilgan. O‘tgan bir yil davomida prezident Shavkat Mirziyoyevning xorijiy davlatlarga tashrifi, O‘zbekistonga tashrif buyurgan bir necha davlat rahbarlari hamda nufuzli xalqaro tashkilotlar yetakchilari bilan bo‘lib o‘tgan muzokaralari haqida atroflicha ma’lumot berilgan.

Kitobda O‘zbekiston va Koreya Respublikasi o‘rtasidagi ko‘p yillik savdo-iqtisodiy va madaniy-gumanitar hamkorlikka ham keng o‘rin ajratilgan.

Kitob "Uz Kor Economy Media Group" tomonidan chop etilgan. Uning muallifi mashhur jurnalist va yozuvchi Cho Chol Xon.