TOShKENT, 24 dek – Sputnik. Yevroosiyo Taraqqiyot bankining Integratsion tadqiqotlar markazi "YeOTB integratsion barometri" deb nomlangan integratsion tadqiqotlari natijasini e’lon qildi. Unda MDH mintaqasida yashovchi aholi o‘rtasida 2017-yil yozida o‘tkazilgan so‘rov natijalari keltirilgan.
Tadqiqot natijalariga ko‘ra, keyingi bir yilda ayrim mamlakatlar aholisining qarashlarida keskin o‘zgarishlar yuz bergan. Xususan, Qozog‘istonda aholining O‘zbekistonga nisbatan ishonchi 9 punktga — 24%ga oshgan.
Tojikistonda ham O‘zbekistonga nisbatan ishonchsizlik va xavotir 14%gacha pasaygan.
"Aytish mumkinki, Tojikiston aholisining ommaviy tafakkurini "O‘zbekiston do‘st emas" degan fikr tark etmoqda, zero 2012-yilda bu ko‘rsatkich 64%ni tashkil etgan", deyiladi tadqiqotda.
Qirg‘izistonda ham ana shunday fikrda bo‘lganlar miqdori 19 punktga kamayib, 33%ni tashkil etgan. 2016-yilda tadqiqotda ishtirok etganlarning 52%i "O‘zbekiston Qirg‘izistonga do‘st emas" degan fikrni bildirgan.
Qayd etilishicha, rossiyaliklarning O‘zbekistonga bo‘lgan ishonchi 4 punktga oshib, 26%ga yetgan. Bu kuzatuvlar o‘tkazilayotgan yillardagi eng yuqori natija hisoblanadi.
"YeOTB integratsion barometri" loyihasi 2012-yildan buyon faoliyat olib boradi. Tadqiqotlardan maqsad MDH mintaqasidagi davlatlar aholisining tashqi siyosiy, iqtisodiy, ijtimoiy-madaniy va boshqa integratsion yo‘nalishlardagi fikrlarini bilishdir.
