TOShKENT, 27 dek – Sputnik. Toshkent aeroportida Aviatsiya xavfsizligi xizmati xodimlari bilan hamkorlikda havo yo‘llari orqali o‘q-dorilarning noqonuniy olib o‘tilishiga doir urinishlar fosh qilindi. Bu haqda O‘zbekiston Bojxona qo‘mitasi axborot xizmati xabar berdi.
Xabarda aytilishicha, Islom Karimov nomidagi Toshkent xalqaro aeroportida Tel-Avivga parvozi oldidan xorijiy shaxs F.Baxromovaga tegishli rukzak ko‘zdan kechirilganda, uning 1 dona 5,45 mm. kalibrdagi patronni olib chiqishga uringani fosh bo‘ldi.
"Toshkent-Seul" reysi bo‘yicha parvozga otlangan O.Aleksey ismli shaxs ham 1 dona 5,45 mm. va 1 dona 9 mm.kalibrdagi patronlarni yo‘lovchi bojxona deklaratsiyasida va bojxona xodimlarining og‘zaki so‘rovi paytida ma’lum qilmasdan turib, olib chiqishga uringan paytda to‘xtatib qolindi.
Surishtiruvlar davomida u egnidagi kurtkasining cho‘ntagidan topilgan patronlarning qayerdan kelib qolganligini go‘yoki bilmasligini ta’kidladi.
Hozirda ushbu holatlar yuzasidan bojxona tekshiruvlari va surishtiruv jarayonlari davom ettirilmoqda.
O‘zbekiston Respublikasi Jinoyat kodeksining 246-moddasiga binoan, kontrabanda, ya’ni bojxona nazoratini chetlab yoki bojxona nazoratidan yashirib, deklaratsiyasiz o‘q-dorilarni O‘zbekiston Respublikasining bojxona chegarasidan o‘tkazish besh yildan o‘n yilgacha ozodlikdan mahrum qilish bilan jazolanadi.
Eslatib o‘tamiz, shu yilning martida Toshkent aeroportida Isroil armiyasida xizmat muddatini yakunlagan askar qo‘lga olingan — uning yuklari orasidan 13 dona patron topilgandi.
