O‘zbekiston fuqarolarga oliy ma’lumot olish imkoniyatini kengaytirdi

TOShKENT, 24 yanv — Sputnik. O‘zbekiston prezidenti tomonidan tasdiqlangan 2018-yilgi Davlat dasturida "Oliy ta’lim muassasalariga qabul kvotalarini 2018-2019 o‘quv yilida 2017-2018 o‘quv yiliga nisbatan kamida 20 foizga oshirish" belgilangan.

Ushbu loyihaga Davlat budjeti mablag‘lari va to‘lov-shartnoma mablag‘laridan 39,0 mlrd. so‘m sarflash ko‘zda tutilgan.

Loyihada: fuqarolarning oliy ta’lim olish imkoniyatlarini yanada kengaytirish; oliy ta’lim muassasalariga imtiyozli qabul qilish uchun O‘zbekiston yoshlar ittifoqining tavsiyanomasini olgan abituriyentlar hamda haqiqiy harbiy xizmatni o‘tagan va tegishli sertifikatni olgan yigitlarni ushbu muassasalarga alohida kvotalar bo‘yicha qabul qilish nazarda tutiladi.

Shuningdek, dasturda oliy ta’lim muassasalariga kirish imtihonlarining maksimal darajada shaffofligini ta’minlash, jamoatchilik nazoratini kuchaytirish, test natijalarini tezkor e’lon qilishning zamonaviy mexanizmlari amalda ijro etilishini ta’minlash belgilangan.

Buning uchun oliy ta’lim muassasalariga kirish test sinovlarini bir necha kun davomida o‘tkazish; test sinovi natijalarini test o‘tkazilgan kunning ertasiga e’lon qilish; jamoatchilik, jumladan abituriyentlar ota-onalarining kirish test sinovlarini onlayn rejimida kuzatib borish imkoniyatini yaratishga oid tadbirlar nazarda tutilgan.