TOShKENT, 10 mar — Sputnik. Maqsudjon Abdullayevich Yo‘ldoshev maktabgacha ta’lim vaziri o‘rinbosari lavozimiga tayinlandi. O‘zbekiston prezidenti Shavkat Mirziyoyev bu haqdagi tegishli qarorni imzoladi.
Maktabgacha ta’lim vazirligi matbuot xizmatining bildirishicha, u boshqa ishga o‘tgan Gulchehra Yo‘ldosheva o‘rniga ushbu lavozimga tayinlandi.
Maqsudjon Yo‘ldoshev Toshkent davlat iqtisodiyot universitetini bitirgan, mehnat faoliyatini 2000-yilda boshlagan. U dastlab metodist, so‘ngra "Ustoz" respublika jamg‘armasida hisobchi bo‘lib ishlagan.
Keyinchalik u "Iste’dod" jamg‘armasi, Xalq ta’limi vazirligining nazorat-tahlil boshqarmasida faoliyat ko‘rsatgan.
2010 yilda O‘zbekiston prezidenti huzuridagi Davlat va jamiyat qurilishi akademiyasini tamomlagan.
2012-2016 yillarda Abdulla Avloniy nomidagi Xalq ta’limi tizimi xodimlarini qayta tayyorlash va malakasini oshirish markaziy instituti rektori,
2016-2017 yillarda Xalq ta’limi vazirligining ta’lim muassasalari faoliyatini tashkil etish bo‘yicha bosh boshqarmasi boshlig‘i, 2017-yildan O‘zbekiston prezidenti devonining bosh maslahatchisi sifatida ishlagan.
