TOShKENT, 27-iyun — Sputnik. "O‘zbekiston va Amerika Qo‘shma Shtatlarida saylov bo‘lib o‘tganidan keyin, mamlakatlarimiz o‘rtasidagi munosabatlar yangi bosqichga chiqdi va ikki davlat rahbarlari o‘rtasida muntazam ravishda o‘zaro aloqalar o‘rnatildi, dedi chorshanba kuni Xalqaro Press-klub yig‘ilishida ShHT Bosh kotibi, Strategik va mintaqalararo tadqiqotlar instituti rahbari Vladimir Norov.
Tadbirda spikerlardan biri sifatida ishtirok etgan Vladimir Norov O‘zbekiston va AQSh o‘rtasidagi munosabatlarining hozirgi va istiqboldagi holati haqida o‘z fikrlarini bildirdi.
Xususan, O‘zbekiston va AQSh prezidentlari 2017-yilning o‘zida ikki marotaba — birinchi marta may oyida Saudiya Arabistonida — arab-musulmon davlatlar va AQSh sammitida, ikkinchi marta esa BMT Bosh Assambleyasining 72-sessiyasi davomida yuzma-yuz uchrashishganini qayt etdi.
"AQSh ma’muriyati shu yilning may oyida prezident Donald Trampning shaxsiy taklifiga binoan O‘zbekiston prezidentining ushbu davlatga qilgan tashrifini "tarixiy" deb baholadi. Bundan tashqari, ular tomonidan mazkur oliy darajadagi muzokaralar ikki davlat o‘rtasidagi strategik hamkorlikni yangi davri sifatida baholandi", — dedi Norov.
ShHT Bosh kotibining so‘zlariga ko‘ra, amerikalik senatorlar oxirgi yillarda O‘zbekiston va AQSh munosabatlari oldinlab ketganini, bunday aloqalar shu yillargacha kuzatilmaganini e’tirof etishgan.
O‘zbekiston prezidentining AQSh Kongressi va yetuk tashkilotlarda o‘tkazgan muzokaralari natijasi shuni ko‘rsatgan-ki, O‘zbekistonda keng ko‘lamli islohotlar va o‘zgarishlarni qo‘llab-quvvatlashda AQSh yuqori siyosiy doiralarda yagona pozitsiyaga ega. Jumladan, Oq Uyda bo‘lgan uchrashuvda AQSh prezidenti Donald Tramp O‘zbekistonda ro‘y berayotgan muhim siyosiy, iqtisodiy-ijtimoiy islohotlarni, erishilgan natijalarni "ulkan taraqqiyot", deb baholagan.
"O‘zbekiston prezidentining AQShga tashrifini ikki tomonlama munosabatlarda sifat jihatdan keskin burilish bo‘lganligining yorqin ifodasi, deb bilamiz. Vashingtonda bo‘lib o‘tgan muzokaralar yakunida ikki mamlakat prezidentlari O‘zbekiston va AQSh yangi davrining boshlanishi deb nomlangan Qo‘shma bayonotni qabul qilishdi. Shuningdek turli sohalarda o‘zaro manfaatli aloqalarni yanada mustahkamlashga qaratilgan bir qator salmoqli hujjatlar imzolandi", — deb ta’kidladi Norov.
O‘zbekiston prezidentining AQShga rasmiy tashrifi, nafaqat Toshkent va Vashington o‘rtasidagi munosabatlarda yangi sahifani ochdi, balki butun Markaziy Osiyo mintaqasining siyosiy hayoti uchun muhim voqea bo‘ldi. Shu bilan birga, hozirgi kunda bir qator dolzarb masalalar yechimi ikki davlat o‘rtasidagi munosabatlarning rivojlanishiga bog‘liqdir.
"Prezidentimizning mintaqaviy hamkorlikni mustahkamlash va rivojlantirish, Afg‘onistonda xavfsizlik va barqarorlikni ta’minlash kabi tashabbuslarini AQSh va dunyoning boshqa yetakchi davlatlari qo‘llab-quvvatlamoqda", — dedi diplomat va shu o‘rinda Trampning Afg‘oniston bo‘yicha Toshkent anjumani muvaffaqiyatli o‘tgani bilan O‘zbekiston prezidentiga yo‘llagan samimiy tabrigini esga oldi.
Ikki tomonlama imzolangan tijorat shartnomalari va bitimlar yetakchi xorijiy davlatlar ishbilarmonlari doiralarida O‘zbekiston bozorining uzoq muddatli barqaror rivojlanishi va jozibadorligi borasida ishonch uyg‘otadi, bu esa, albatta, yaqin kelajakda O‘zbekistonga transmilliy kompaniyalar va xalqaro moliya institutlarni sarmoyalarni olib kelishiga asos bo‘ladi va zamin yaratadi, deya ishonch bildirdi Norov.
Siyosatchiga ko‘ra "O‘zbekiston prezidentining AQShga tashrifi chog‘ida erishilgan kelishuvlar ikki davlat munosabatlarida o‘zaro hamjihatlikni namoyon etmoqda. "Mirziyoyevning AQShga tashrifi natijasida ikki mamlakat o‘rtasidagi munosabatlarning yanada rivojlanishi va mustahkamlanishi O‘zbekistonning xalqaro nufuzi oshishida muhim qadam bo‘ladi", deb o‘z fikrini yakunladi diplomat.
