Sport

“Oʻylaymanki, biz hozir toʻgʻri yoʻldamiz”: Ektor Kuper Osiyo kubogini qoʻlga kiritmoqchi

Obuna boʻlish
NovostiTelegram
Oʻrtoqlik uchrashuvlarida magʻlub boʻlganiga qaramay, Oʻzbekiston milliy terma jamoasi bosh murabbiyi Ektor Kuper optimistik ruhda va Osiyo kubogiga gʻalaba qozonish niyatida.

TOSHKENT, 7 dek - Sputnik. Oʻzbekiston milliy terma jamoasi bosh murabbiyi Ektor Kuper matbuot anjumanida Osiyo kubogi -2019 tayyorgarlik jarayoni va boʻlib oʻtgan yigʻinlar xususida oʻz fikrlarini bildirib oʻtdi.

Milliy terma jamoa murabbiyi Livanga qarshi oʻrinda 0:0 va Janubiy Koreyaga qarshi soʻnggi oʻrtoqlik oʻyinida 0:4 hisobga erishilgan natijalar muxlislarni qattiq tushkunlikka tushirmaslik kerakligi taʼkidladi.

“Avstraliyada oʻtkazgan yigʻinimizda boʻlib oʻtgan uchrashuvlardagi natijalar ijobiy boʻlmaganini taʼkidlay olaman. Lekin oʻrtoqlik oʻyinlari va yigʻinlar mavjud muammolarni koʻrib, bilib olish uchun yaxshi imkoniyat hisoblanadi. Sekin-asta mana shu kamchiliklarni bartaraf etgan holda Osiyo kubogiga yaxshi hozirlik olib borishga urinamiz. Osiyo kubogidan umidlarimiz katta. Maqsadimiz qitʼaning bosh musobaqasida gʻalaba qozonish”, - deydi bosh murabbiy.

Har qanday oʻrtoqlik oʻyini yoki rasmiy uchrashuvga bir xil yondashaman. Lekin oʻrtoqlik oʻyinlarining yaxshi jihati shundaki, oʻzingizda mavjud imkoniyatdan kelib chiqib, yangi taktikalarni sinab koʻrish mumkin. Balki mening oʻyin uslubim kimgadir yoqmayotgan boʻlishi mumkin. Agar oʻzim xato qilganimga amin boʻlsam, oʻz uslubimni oʻzgartirishim ham mumkin. Men buni toʻgʻri qabul qilaman, deb qoʻshimcha qildi u.

Osiyo kubogiga tarkib tanlashda urgʻu faqatgina noyabrda boʻlib oʻtgan yigʻinda qatnashgan futbolchilarga qaratilmaydi. Muxlislar Osiyo kubogiga boradigan tarkibda umuman yangi nomlarni koʻrishlari ham mumkin boʻladi.

“Asosiysi muxlislar uchun qayd etiladigan natija muhim. Biz ham mavjud tarkibdan kelib chiqqan holda, zarur taktik uslubda oʻz oʻyinimizni shakllantiramiz. Eng muhimi - oʻyinimizda muvozanat boʻlsa boʻlgani. Oʻyinchilar men talab qilayotgan jihatlarni bajarishga qodir. Ularning mahorati mening talablarimni bajarishga yetishiga koʻzim yetayapti. Agar mening talablarim yigitlarga mos kelmasa, men oʻz talablarimni oʻzgartirishim ham mumkun. Men hech qachon oʻz talablarimda qattiq turib olmayman, agar zarur boʻlsa uni yigitlarga moslashtirishim ham mumkin”, - deya fikrlarini bildirdi Ektor Kuper.

Bosh murabbiy optimistik ruhda ekanligi va Osiyo kubogiga gʻalaba qozonish niyatida yoʻl olganini qoʻshimcha qildi.

“Baʼzan magʻlubiyatlardan soʻng hammada kayfiyat tushib ketadi. Lekin men murabbiylik faoliyatim davomida bunaqa vaziyatlarni koʻp koʻrganman. Ideal jamoa boʻlish qiyin.  Nasib qilsa, hali oldinda yaxshi oʻyinlar va chiroyli gʻalabalarga guvoh boʻlamiz”, -deb taʼkidladi Kuper.

Eslatib oʻtamiz, Osiyo Kubogi Birlashgan Arab Amirliklarida kelasi yil 5 yanvardan 1 fevraligacha boʻlib oʻtadi. Oʻzbekisiton terma jamoasi F guruhida Yaponiya, Ummon va Turkmaniston bilan maydonga tushadi.

Yangiliklar lentasi
0