TOShKENT, 27 dek - Sputnik. O‘zbekiston prezidentining Afg‘oniston bo‘yicha maxsus vakili Ismatulla Irgashev Eron elchisi Bahman Og‘oroziy Do‘rmoniy bilan uchrashdi, deb xabar berdi TIV matbuot-xizmati.
Ta’kidlanishicha, suhbatda O‘zbekiston – Eron kun tartibining dolzarb masalalari yuzasidan fikr almashilgan.
2018-yilda ikki tomonlama munosabatlardagi ijobiy o‘sish mamnuniyat bilan qayd etilgan va 2019-yildagi qo‘shma tadbirlar jadvali bo‘yicha takliflar ko‘rib chiqilgan.
Uchrashuvda Afg‘onistondagi tinchlik jarayoniga ko‘maklashish doirasida hamkorlik masalasiga ham e’tibor qaratilgan. Ushbu mamlakatda infratuzilma loyihalarini amalga oshirishda, jumladan mintaqaviy ahamiyatga ega temir yo‘l magistralini qurishda hamkorlik qilish istiqbollari muhokama qilingan.
