TOShKENT, 17 fev – Sputnik. O‘zbekiston Innovatsion rivojlanish vazirligida “Blokcheyn - korrupsiyaga qarshi innovatsion tizim” mavzusida davra suhbati bo‘lib o‘tdi, deb xabar qilmoqda O‘zA.
Suhbat davomida O‘zbekistonda davlat xizmatlari sohasida blokcheyn texnologiyasini qo‘llash yordamida korrupsiyaga qarshi kurashish masalalari muhokama qilindi.
Xususan, BMT Taraqqiyot dasturining “Davlat boshqaruvini samarali rivojlantirish va raqamli transformatsiyaga ko‘maklashish” loyihasining milliy konsultanti Bunyod Hoshimxo‘jayev, O‘zbekistonda 2018 yilning may oyidan beri bu sohada amalga oshirilgan qator ishlar qilingani haqida so‘zladi.
Xoshimxo‘jayev aytishiga ko‘ra, maktab attestatlarini qalbakilashtirish, davlat kadastr idoralarida tovlamachilikka yo‘l qo‘ymaslik hamda ko‘chmas mulk egalarining hisob yozuvlariga noqonuniy o‘zgartirishlar kiritishlariga imkon qoldirmaslik maqsadida – 2018-yilning may oyidan boshlab, tajriba tariqasida, blokcheyn texnologiyasini qo‘llash amaliyoti joriy etilgan.
“Bugungi kunda blokcheyn texnologiyasi amalda qo‘llanilmoqda va u kadastr hisobi va ko‘chmas mulkni ro‘yxatdan o‘tkazish sohasidagi faoliyatning oshkoraligini ta’minlamoqda”, - deyilgan xabarda.
O‘zbekiston Yer resurslari, geodeziya, kartografiya va davlat kadastri davlat qo‘mitasi kadastr hisobi va ko‘chmas mulkni ro‘yxatdan o‘tkazish tizimida blokcheyn texnologiyalarning afzalliklari va imkoniyatlarini o‘rganib chiqib unining afzalliklarini qayd etgan.
Shuningdek, suhbat davomida, davlat xizmatlarini takomillashtirish, davlat muassasalarining shaffofligi va hisobdorligini ta’minlash maqsadida - davlat xizmatlarining boshqa sohalarida ham blokcheyn tizimini integratsiya qilishni davom ettirish lozimligiga e’tibor qaratildi.
Eslatib o‘tamiz, so‘nggi yillar davomida O‘zbekistonda koorupsiyaga qarshi qator choralar ko‘rilmoqda. 2018-yili 1561 nafar turli toifadagi mansabdor shaxslar korrupsiyada ayblanib, jinoiy javobgarlikka tortilgan edi.
