TOShKENT, 25-iyul - Sputnik. Moskva viloyatiga qisqa vaqtga quldorlik tizimi qaytib keldi, deb xabar qilmoqda "Vesti" telekanali.
Tojikistonlik ona va bola o‘zbekistonlik 4 nafar migrantlarni quldek ishlatishdi. Dastlab ular ishchilarga 15 kunga 250 dollardan maosh to‘lashini va’da berib, Moskva viloyatiga olib kelgan. Lekin o‘z va’dasining ustidan chiqmagan. Undan tashqari ular registratsiya qilish bahonasida, migrantlarning pasportlarini olib qo‘yib, qaytarib bermagan.
Shundan so‘ng migrantlar 1 oydan ortiq faqat ovqat evaziga ishlashga majbur bo‘lishgan. Oxir oqibat ular politsiyaga murojaat qilishgan.
Ayni damda tergov ishlari olib borilmoqda. Tojikiston fuqarolariga 10-yil qamoq jazosi berilishi mumkin.
Shu o‘rinda mehnat qilish uchun kelayotgan hamurtlarimizga yana bir bor eslatib o‘tmoqchimiz. Har qanday ishni boshlashdan avval ish beruvchi bilan shartnoma imzolash kerak. Xoh u yuridik, hoh jismoniy shaxs bo‘lsin.
Imzolangan shartnomangiz bo‘lmasa va ish beruvchi bilan nizo kelib chiqsa - hech qanday politsiya yoki sud sizning maoshingizni olib bera olmaydi. Rossiyada qonun himoyasida bo‘lay desangiz – o‘zingiz ham barcha hujjatlaringizni belgilangan tartibda rasmiylashtirib qo‘ying.
