TOShKENT, 10 dek — Sputnik. Hozirda Toshkent Yevroosiyo iqtisodiy ittifoqi (YeOII) salohiyatini batafsil o‘rganmoqda. Bu haqda mamlakat moliya vaziri Jamshid Qo‘chqorov Sputnik O‘zbekiston muxbiriga ma’lum qildi.
“O‘zbekiston YeOII doirasidagi integratsion jarayonlarning ijobiy va salbiy tomonlariga baho bermoqda, - dedi Qo‘chqorov. – Menimcha, ijobiy tomonlari ko‘proq. Qaror qabul qilish bir kunlik yoki bir oylik ish emas. Agar bu bizga foydali bo‘lsa, albatta, qo‘shilamiz”.
Vazirning so‘zlariga ko‘ra, respublika xalqaro hamkorlikni kengaytirishga tayyordir.
“Har bir mamlakat, O‘zbekiston ham bundan mustasno emas, jahon iqtisodiyoti, savdo munosabatlari, ayrim infratuzilma jarayonlariga integratsiyalashishga intiladi, - deb ta’kidladi u. – Atrofimizda ro‘y berayotgan jarayonlar, albatta, e’tiborimizdan chetda qolmaydi”.
O‘zbekistonda mamlakatning mintaqaviy va xalqaro tuzilmalarga qo‘shilishi xususida jamoatchilik va ekspert muhokamalar davom etmoqda. Xususan, Prezident administratsiyasi huzuridagi Iqtisodiy tadqiqotlar va izlanishlar markazida “Amaliy umumiy muvozanat modellari va O‘zbekistonning JST va YeOIIga qo‘shilishi ta’sirini baholash” mavzusida seminar bo‘lib o‘tdi.
Eslatib o‘tamiz, Yevroosiyo iqtisodiy ittifoqiga qo‘shilish masalasini ishlab chiqishni joriy yilning kuz oyida O‘zbekiston prezidenti Shavkat Mirziyoyev topshirgan edi. Hozirda YeOOIga Rossiya, Qozog‘iston, Qirg‘iziston, Belarus va Armaniston a’zodir.
