Bozor yaqinida va yer osti yo‘llarida mahsulot sotish taqiqlanadi – hukumat qarori

TOShKENT, 25 dek – Sputnik. “O‘zbekiston Respublikasi Hukumatining ayrim qarorlariga qo‘shimcha va o‘zgartirishlar kiritish to‘g‘risida”gi hukumat qarori loyihasi umumiy muhokamaga qo‘yildi.

Hujjat Davlat soliq qo‘mitasi tomonidan tayyorlangan.

Vazirlar Mahkamasining 2003-yil 13-fevraldagi 75-son qarori (15-modda) bilan tasdiqlangan O‘zbekiston Respublikasida chakana savdo qoidalarida quyidagi mazmundagi 4² kichik band bilan to‘ldirish taklif etilgan:

“4². Tovarlar, mahsulotlarni (xizmatlarni) yer osti yo‘llarida, ko‘priklarda, avtomobil yo‘llarining qatnov qismlarida, avtotransport vositalarini vaqtincha saqlash joylarida cotish taqiqlanadi”;

Shuningdek, Vazirlar Mahkamasining 2012-yil 28-avgustdagi 253-son qarori bilan tasdiqlangan O‘zbekiston Respublikasi bozorlarida savdo faoliyatini tashkil etish qoidalari (61-modda)ning 13-bandini quyidagi mazmundagi uchinchi xatboshi bilan to‘ldirilsin:

“tovarlar (mahsulotlar) va xizmatlarni bozorga kirish va chiqish yo‘laklarida, bozor hududidagi avtotransport vositalarini vaqtincha saqlash joylarida sotish taqiqlanadi”.