TOShKENT, 26 dek — Sputnik. Rossiya Tashqi ishlar vazirligi rahbari Sergey Lavrov 2020-yil 12-13 yanvar kunlari O‘zbekistonda rasmiy tashrif bilan bo‘ladi, deb xabar qildi RF TIV rasmiy vakili Mariya Zaxarova brifingda. Bu haqda RIA Novosti xabar bermoqda.
Diplomat so‘zlariga ko‘ra, Lavrovni mamlakat prezidenti Shavkat Mirziyoyev qabul qiladi, shuningdek, u o‘zbek hamkasbi Abdulaziz Kamilov bilan muzokaralar o‘tkazadi.
Bundan tashqari, Rossiya tashqi siyosiy mahkama rahbari 9-dekabr kuni ochilgan Toshkentdagi Rossiya TIV MGIMO filiali professor-o‘qituvchilar tarkibi va talabalari qarshisida chiqish qiladi.
Rejalashtirilgan aloqalar davomida ikkiyoqlama siyosiy, savdo-iqtisodiy va madaniy-gumanitar hamkorlikning barcha jabhalari ko‘rib chiqiladi.
"Rossiya prezidentining o‘tgan yil 18-oktabrda O‘zbekistonga amalga oshirgan davlat tashrifi davomida bo‘lgan kelishuvlarni amalga oshirish, shuningdek, 2020-yilda oliy va yuqori darajada bo‘lib o‘tadigan tadbirlarga tayyorgarlik masalalariga alohida e’tibor qaratiladi", - dedi Zaxarova.
Ikki mamlakat tashqi ishlar vazirliklari o‘rtasida 2020-2021 yillarga hamkorlik dasturini imzolash rejalashtirilmoqda.
Zaxarovaga ko‘ra, "bunday hamkorlik Rossiya va O‘zbekiston o‘rtasida mavjud o‘zaro ishonchga asoslangan munosabatlarning strategik sheriklik va ittifoqdoshlik darajasini aks ettiradi".
