TOShKENT, 28 dek - Sputnik. Kamerun respublikasidan O‘zbekistonga kelib fuqarolarni katta miqdordagi mablag‘ga chuv tushirgan besh nafar firibgarlarning ishi yaqin orada sudga oshiriladi. Bu haqda IIV axborot xizmati ma’lum qilmoqda.
Qayd etilishicha, Kamerunning ayni damda O‘zbekistonda bo‘lgan 5 nafar fuqarolari jinoiy harakatlari yuzasidan tergov surishtiruv ishlari olib borilmoqda.
Gap shundaki, ushbu shaxslar internet tarmog‘i orqali o‘zbekistonlik fuqarolarning ishonchiga kirib, avvaliga ularning moddiy ahvoli haqida yetarli ma’lumotga ega bo‘lishgan. So‘ng o‘zlarini O‘zbekistonga 2 mln dan 10 mln dollargacha sarmoya kiritish imkoniyatlari borligini aytib, sodda insonlarni ishontirishgan. Bu masalada gaplashib olish uchun O‘zbekistonga sayyoh sifatida kelib, fuqarolarni 340.000 $ dollarga chuv tushirishgan. Shuningdek, tergov jarayonlarida ularning qalbaki pul yasash bilan shug‘ullanganliklari aniqlangan.
"Agar siz suratlarda ko‘rsatilgan shaxslarning jinoiy harakatlaridan jabr ko‘rgan bo‘lsangiz, yaqin oradagi ichki ishlar bo‘limiga yoki "102" telefoni hamda IIV tergov departamentining (+99871) 231-30-97, (+99871) 231-36-22 va (+99871) 233-65-34 telefonlari orqali murojaat qilishingizni so‘raymiz", deyiladi departament xabarida.
