TOShKENT, 21 apr - Sputnik. O‘zbekistonda ro‘yxatga olingan 247 286 yakka tartibdagi tadbirkorlarning 198 969 nafari, ya’ni qariyb 80,5 foizi o‘z faoliyatini vaqtincha to‘xtatib qo‘ydi. Bu haqda Davlat soliq qo‘mitasi matbuot xizmati xabar berdi.
DSQ Maxsus respublika komissiyasi karantinni 2020-yil 10-maygacha uzaytirganini eslatdi va milliy xavfsizlikni ta’minlash masalasidan keyin iqtisodiy muammolar va uning tarmoqlari va tarmoqlarining kelgusida barqaror ishlashi muhim ahamiyat kasb etishini ta’kidladi.
Mamlakatda soliq to‘lovchilar uchun yengillashtiruvchi choralar joriy etildi. Masalan, bir qator soliqlarni to‘lash muddati uzaytirildi, kechiktirish va bo‘lib-bo‘lib to‘lash huquqi berildi, soliq stavkalari pasaytirildi, penya va jarimalar to‘lash to‘xtatildi.
Shuningdek, fors-major holatlariga duch kelgan yakka tartibdagi tadbirkorlarga ham yengilliklar taqdim etildi. Karantin davrida YaTTlar uchun jismoniy shaxslar uchun belgilangan daromad solig‘i miqdorini va ijtimoiy soliqni hisoblash to‘xtatib qo‘yiladi.
Prezidentning 2020-yil 3-apreldagi "Koronavirus pandemiyasi davrida aholini, iqtisodiyot tarmoqlarini va tadbirkorlik subyektlarini qo‘llab-quvvatlash bo‘yicha qo‘shimcha chora-tadbirlar to‘g‘risida" gi farmonining 5-bandiga binoan yakka tartibdagi tadbirkorlar davlat soliq xizmatini o‘z faoliyatini vaqtincha to‘xtatib turishi to‘g‘risida xabardor qilishlari kifoya.
Buni my.soliq.uz portalida "karantin davrida soliqni to‘lashni to‘xtatib qo‘yilishi to‘g‘risida bildirishnoma yuborish" xizmati orqali davlat ro‘yxatidan o‘tkazilganligi to‘g‘risida guvohnomani topshirmasdan amalga oshirish mumkin.
Birgina aprel oyi davomida ushbu xizmatdan 2,4 ming soliq to‘lovchi foydalangan: Samarqand viloyatidagi yakka tartibdagi tadbirkorlardan 1283, Toshkent shahridan 542, Toshkent viloyatidan 125, Sirdaryo viloyatidan 89, Qashqadaryo viloyatidan 80 ta bildirishnoma yuborilgan.
Ularga 1,1 mlrd. so‘m miqdorida belgilangan daromad solig‘i va ijtimoiy soliq hisoblanmagan.
